Almaty oblysy Eńbekshiqazaq aýdanynyń bilim bóliminde eńbek etken Zarıma Qojmambetova Astanaǵa kelip, ádildik izdep júr. Basqarmada bas maman bolǵan onyń ústinen is qozǵalyp, sot úkimimen oǵan 1,5 mln teńge aıyppul salynǵan, dep habarlaıdy «Adyrna» ulttyq portaly Qaz365.kz-ke silteme jasap.
Zarıma Astanaǵa bir býma qujattarymen kelgen. Ózi jalǵyzbasty ana. Byltyr ákesi qaıtys bolǵan kezde ustazdar qaýymynan bata retinde Kaspı gold nómirine 40 myń teńge túsken. Zarıma sony jeleý etip, ustazdardy uıymdastyryp, ózine jala jabyldy dep esepteıdi.
- 25 qyrkúıek kúni meni jumystan jalamen shyǵaryp jiberdi. Munda kelgen sebebim – jumysqa qaıta turýym kerek. Men Eńbekshiqazaq aýdanynyń Bilim bóliminde osy ýaqytqa deıingi bolyp jatqan qylmystardyń bárin alyp keldim. Sonyń bárin kórsetemin. Qazirge deıin Bilim bóliminde ártúrli quıtyrqy ister júrip jatyr. Atap aıta alamyn. Oblys ákimi Almaty oblysynyń ákimi oblystyń Bilim basqarmasynyń basshysyn qoldap otyr dep oılaımyn. Óıtkeni Saltanat Bespaeva (basqarma basshysy) kelip, jınalys ashqan saıyn «ákim ekeýmiz bir óńirde ósip, bir mektepte oqyǵanbyz, ol kisi meni qoldaıdy» dep, qoqan-loqysyn ustazdarǵa kórsetip jatady. Osy kúnge deıin qylmystaryn aıtqanym úshin maǵan jala jabylyp otyr – deıdi ol.
Zarıma Qojmambetovaǵa sot sheshimi boıynsha 1,5 mln teńge aıyppul salynǵan. Onyń aıtýynsha NOBD-da (ustazdar bazasy) joq M.Muqataı degen ustaz da oǵan qarsy aryz bergen.
- Ol jerde tirkelmese, maǵan qarsy aryzdy ol qalaı jazyp ketti? Eńbekshiqazaq aýdandyq sotyna múlde túsiniktemesi joq adam keldi. Túsinikteme odan alynbaǵan. Sheshimde sol adamnyń esimi jazylyp tur. Meni sol M.Muqataı degen adam oılandyrady. 6 adam aryz jazdy deıdi. Alty adamnyń tórteýi «Zarıma birde-bir ret bizden aqsha bopsalady, surady» dep aıtqan joq. Sotta ony ózderi moıyndady», – deıdi Zarıma.
Sot úkimi Almaty oblysy Eńbekshiqazaq aýdanyna qarasty Esik qalasynda ornalasqan №2 sotynda shyqqan. Sot qaýlysynda Zarıma Qojmambetova 6 qarashada bir mekteptegi tárbıeshi, muǵalimder men psıhologtardan, atap aıtqanda 6 700 teńgeden, jalpy 40 000 teńge «zańsyz materıaldyq syıaqyny ózine tıesili «Kaspi.kz» qosymshasy arqyly «tekserý barysynda atalǵan mektepte oryn alǵan kemshilikterdi anyqtamada kórsetpeýi úshin alǵan» dep jazylǵan. Alaıda bul aıyppen Zarıma kelispeıdi.
Zarıma Qojmambetovanyń ákesi aýyr dertten kóz jumǵan. Zarımanyń áriptesteri, aýdandyq tárbıe mamandary qaıtys bolǵan adamnyń úıine kelip, kóńil aıtýmen qatar «az da bolsa kómek bolsyn» dep, 3000-5000 teńge arasynda qarajattardy Zarımanyń kartasyna aýdarady. Biraq bata jasamaǵan bir top muǵalim Antıkorǵa «aryzdanǵan».
Zarıma Antıkordyń oblystaǵy ókilinen tanysý úshin is-materıaldaryn ala almaǵanyn aıtyp shaǵymdandy. Sýdıa Aınur Sultanova Zarımaǵa «sizdi jumystan shyǵarmaıdy» degenimen 24 qyrkúıekte jumystan shyǵarǵan. Endi qaıtadan jumysqa ornalasý úshin Zarıma Oqý-aǵartý mınıstri Ǵanı Beısembaevpen kezdesip, sonyń aldynda másele kótergisi keledi.
