قۇقىقتىق ءتارتىپ اسكەرىندە ساربازداردىڭ قوعام قايراتكەرلەرىمەن، اتاقتى سپروتشىلارمەن كەزدەسۋى داستۇرگە اينالعان. بۇل جولى «وڭتۇستىك» وڭىرلىك قولباسشىلىعىنداعى ۇلاندىق جاۋىنگەرلەر بوكستان اتى اڭىزعا اينالعان، تاۋەلسىز قازاقستاننىڭ العاشقى وليمپيادا چەمپيوندارىنىڭ ءبىرى - بالقاش جولبارىسى ۆاسيلي جيروۆپەن جۇزدەستى.
1996 جىلعى اتلانتا وليمپياداسىنىڭ چەمپيونىمەن كەزدەسۋ «وڭتۇستىك» وڭىرلىك قولباسشىلىعى تاربيە جانە الەۋمەتتىك-قۇقىقتىق جۇمىستار باسقارماسىنىڭ ۇيىمداستىرۋىمەن جۇزەگە استى. 5571 اسكەري بولىمىندە وتكەن شاراعا 300-دەن اسا سارباز قاتىستى.
بالقاش جولبارىسى بيىك بەلەستەردى باعىندىرۋ جولىندا تالاي كەدەرگىلەر مەن قيىندىقتارعا تاپ بولعانىن، تەك ەرەن ەڭبەكتىڭ ارقاسىندا ءبارىن ەڭسەرە بىلگەنىن اسىقپاي وتىرىپ بايانداپ بەردى. بيىك ارماندارعا جەتۋدىڭ جولدارىمەن ءبولىسىپ، سالاۋاتتى ءومىر سالتىن ۇستانۋعا دا شاقىردى. ساربازدار تاراپىنان قويىلعان ساۋالدار دا جاۋاپسىز قالمادى.
- كەز-كەلگەن سپورت ءتۇرى قاتاڭ ءتارتىپتى تالاپ ەتەدى. جىگىتتەر، سەندەرگە ايتارىم تارتىپكە قول جەتكىزىپ، تەك بيىك بەلەستەردى باعىندىرۋلارىڭدى تىلەيمىن، - دەپ ءسوزىن قورىتىندىلادى ۆاسيلي جيروۆ.
وليمپيادا چەمپيونى ۇلاندىق ساربازدارعا ءوزىنىڭ قولتاڭباسى قويىلعان بوكسەرلىك قولعابى مەن فوتوسۋرەتتەرىن ەستەلىككە تارتۋ ەتتى.
- جيروۆتىڭ اڭگىمەسىن زەيىن قويىپ تىڭداعان ساربازدار ەرەكشە رۋحتانىپ، بۇل كەزدەسۋدەن ۇلكەن اسەر العاندارىنا سەنىمدىمىن. ۆاسيلي جيروۆ – حالقىمىزدىڭ ماقتانىشى، ءوزىنىڭ ەڭبەگىمەن جانە تاباندىلىعىمەن الەمنىڭ سپورت ارەناسىندا قازاقستان تۋىن جەلبىرەتكەن سپورتشى. ۆەل باركەر كۋبوگىنىڭ يەگەرىن شاقىرۋداعى ءبىزدىڭ ماقساتىمىز – ساربازدار اراسىندا سالاۋاتتى ءومىر سالتىن ناسيحاتتاۋ. بولاشاقتا شىڭ باسىنا شىققىسى كەلەتىن ساربازدارعا اعا بۋىن وكىلدەرىنىڭ وسىنداي اقىل-كەڭەسى ەشقاشان ارتىق ەتپەيدى. كەرەگىن ءتۇرتىپ الىپ، قاجەتىنە جاراتادى. سوندىقتان ءبىز بۇل يگى ءداستۇردى جالعاستىرا بەرەمىز، - دەيدى تاربيە جانە الەۋمەتتىك-قۇقىقتىق جۇمىستار باسقارماسىنىڭ باستىعى پودپولكوۆنيك ارمان سەيتوۆ.
كەزدەسۋ سوڭىندا قوناققا قۇرمەت كورسەتىلىپ، «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەەۆتىڭ اتىنان العىس حات تابىستالدى. چەمپيون ساربازدارمەن ەستەلىك فوتوعا ءتۇستى.
قازاقستان رەسپۋبليكاسى ۇلتتىق ۇلانى
«وڭتۇستىك» وڭىرلىك قولباسشىلىعىنىڭ
ءباسپاسوز قىزمەتى
