Almatyda Universitettıŋ 80 jyldyq mereitoiyna orai joǧary oqu orynynyŋ ziialy tülekterı – ūstazdarmen kezdesu öttı. Şara Qazaq ūlttyq qyzdar pedagogikalyq universitetınıŋ damuyna zor üles qosqan ūstazdar men ǧalymdardyŋ ömır joly men ǧylymi-pedagogikalyq qyzmetterın nasihattau maqsatynda ūiymdastyryldy. Sonymen qatar ūlttyq ǧylym men bılımnıŋ ötkenı men bügının, bolaşaǧyn talqylau, jas ǧalymdar men zertteuşılerdıŋ ǧylymi äleuetın damytu mäselelerı kezdesuge arqau boldy.
«El bolaşaǧy – ūstazdardyŋ qolynda. Ūlaǧatty ūstazdardyŋ arqasynda elımızdıŋ pedagogikalyq jäne özge de salalary joǧary bılıktı mamandarmen tolyqtyrylyp jatyr. Tärbielı jastarymyz adal qyzmet etıp, käsıbi bılıktılıkterın arttyruda. Būl eŋ aldymen, sız men bızdıŋ toqtausyz ızdenısımızdıŋ, käsıbımızge degen mahabbatymyz ben adal qyzmetımızdıŋ, elımızge, jas ūrpaqqa degen süiıspenşılıgımızdıŋ belgısı dep bılemın», – dedı universitet rektory Gülmira Qanai.
Jiynda Memleket basşysy Qasym-Jomart Kemelūly Toqaevtyŋ Qazaqstan halqyna Joldauynda aitylǧan ūstazdardyŋ bılıktılıgın arttyru mäselesı talqylandy. Universitettıŋ jetken jetıstıkterı men alǧa qoiǧan josparlary da aityldy. Sonymen qatar bılım ordamyzdyŋ aǧa oqytuşylary men bılım jäne ǧylym salasynda qyzmet etıp jürgen universitet tülekterı öz baiandamalaryn ūsyndy.
Fizika-matematika ǧylymdarynyŋ doktory, professor Erşina Ainagül Qapasovna universitet basşylyǧyna alǧysyn aitty.
«Men osy universitettıŋ 1971 jylǧy tülegımın. Bügınde fizika-matematika ǧylymdarynyŋ doktory, professormyn. Bılım salasynda qyzmet etkenıme 37 jyl boldy. Är jetken jetıstıgım qadırlı ūstazdarymnyŋ qajyrly eŋbegı dep bılemın. Sol kısılerdıŋ jolymen bız de şäkırt tärbielep kelemız. Bızdıŋ basty maqsatymyz – şäkırtterge sapaly bılım beru. Eŋbegımızdı eskerıp, elep jatqan Universitet basşylyǧyna aitar alǧysym şeksız», – dedı ūstaz.
Kezdesu soŋynda ziialy ūstazdardy marapattau räsımı öttı.
