ليتۆا ۇكىمەتى بەلارۋس پرەزيدەنتى الەكساندر لۋكاشەنكونىڭ ءوز حالقىنا قارسى جاساعان قىلمىستارىن تەرگەۋگە ارنالعان ماتەريالداردى گااگاداعى حالىقارالىق قىلمىستىق سوتقا رەسمي تۇردە تاپسىردى. ءتيىستى مالىمدەمە بۇگىن، 30 قىركۇيەكتە ليتۆا ادىلەت مينيسترلىگىنىڭ سايتىندا جاريالاندى، دەپ حابارلايدى «ادىرنا» ءتىلشىسى.
«بەلارۋستە 2020 جىلدىڭ 1 مامىرىنان باستاپ كۇنى بۇگىنگە دەيىن جوعارى لاۋازىمدى ساياساتكەرلەر مەن اسكەري قىزمەتكەرلەردىڭ نۇسقاۋى بويىنشا ادامزاتقا قارسى قىلمىستار، ونىڭ ىشىندە دەپورتاتسيا، قۋدالاۋ جانە باسقا دا ارەكەتتەر جاسالدى دەپ ساناۋعا نەگىز بار»،—دەلىنگەن حابارلامادا.
ادىلەت مينيسترلىگىنىڭ حابارلاۋىنشا، ليتۆا بەلارۋستەگى احۋال تۋرالى قۇجاتتاردى حالىقارالىق قىلمىستىق سوت قاراۋىنا بەرگەن العاشقى مەملەكەت بولىپ وتىر.
ەسكە سالايىق، 2020 جىلى بۇل ەلدە پرەزيدەنت سايلاۋىنان كەيىن جاپپاي نارازىلىق باستالعان ەدى. ول 6 ايدان استام ۋاقىت بويى جالعاستى. قاۋىپسىزدىك كۇشتەرى نارازىلىق اكتسيالارىن قاتاڭ تۇردە باسىپ تاستادى. كەمىندە ءتورت ادام قازا تاۋىپ، جۇزدەگەن ادام وپپوزيتسيالىق ارەكەتتەرى ءۇشىن تۇرمەگە جابىلدى.
