26 قىركۇيەك كۇنى ۋكراينا پرەزيدەنتى ۆلاديمير زەلەنسكي اق ۇيدە اقش پرەزيدەنتى دجو بايدەنمەن جانە ۆيتسە-پرەزيدەنت كامالا حارريسپەن كەزدەستى، دەپ حابارلايدى “ادىرنا” ۇلتتىق پورتالى.
زەلەنسكيدىڭ اق ۇيگە ساپارى كەزىندە اقش كوشباسشىلارى رەسەي ۋكرايناداعى سوعىستا «جەڭىسكە جەتپەيدى» دەپ ۋادە بەردى.
اقش-تاعى پرەزيدەنتتىك سايلاۋعا 39 كۇن قالعاندا زەلەنسكيدى اق ۇيدە قابىلدادى.
ۋكراينانىڭ وسى سوعىستا جەڭىسكە جەتۋىنە كومەكتەسۋ ءۇشىن امەريكا پرەزيدەنتى بەيسەنبى كۇنى تاڭەرتەڭ «اسكەري كومەكتى ۇلعايتۋ» تۋرالى ايتتتى. الايدا، كيەۆ رەسەيگە سوققى بەرۋ ءۇشىن اقش-تا جاسالعان ۇزاق قاشىقتىقتاعى زىمىرانداردى قولدانۋعا رۇقسات بەرۋ تۋرالى ەشتەڭە ايتپادى.
ۆلاديمير زەلەنسكي بۇل مالىمدەمەنى قۇپتاپ، بۇل ونىڭ ەلىنە رەسەيگە قارسى سوعىستا جەڭىسكە جەتۋگە كومەكتەسەتىنىن ايتتى.
بۇعان قوسا، دجو بايدەن گەرمانيادا ۋكراينانىڭ وداقتاس 50 ەلىنىڭ قاتىسۋىمەن «كۇش-جىگەردى ۇيلەستىرۋ» ءۇشىن جوعارى دەڭگەيدەگى سامميت وتكىزۋگە شاقىردى.
زەلەنسكي ساپارىنىڭ العاشقى ناقتى ناتيجەسى پرەزيدەنت بايدەننىڭ ۋكرايناعا شامامەن 8 ميلليارد دوللارعا جاڭا اسكەري كومەك كورسەتەتىنىن جاريالاۋى بولدى. بۇل وسى جىلدىڭ باسىندا اقش كونگرەسى بەكىتكەن 61 ميلليارد دوللارلىق پاكەتتىڭ ءبىر بولىگى.
سونىمەن قاتار، ۋكراينا بىرلەسكەن تىرەك قارۋىنىڭ پلانەر بومبالارىن، Patriot اۋە قورعانىس جۇيەسىنىڭ تاعى ءبىر باتارەياسىن جانە وعان قوسىمشا زىمىراندار الادى. اقش سونىمەن قاتار ۋكرايندىق ۇشقىشتاردى F-16 جويعىشتارىن باسقارۋعا ۇيرەتۋ باعدارلاماسىن كەڭەيتەدى.
بۇدان بولەك، ۆلاديمير زەلەنسكي ۆيتسە-پرەزيدەنت جانە دەموكراتيالىق پارتيانىڭ كانديداتى كامالا حارريسپەن كەلىسسوزدەر جۇرگىزدى، ول قازىرگى پرەزيدەنتتىڭ ۋكرايناعا قاتىستى ساياساتىن جالعاستىرۋعا ۋادە بەردى.
ودان كەيىن ۋكراينا پرەزيدەنتىن كونگرەسستە سەناتتاعى رەسپۋبليكالىق جانە دەموكراتيالىق پارتيالاردىڭ جەتەكشىلەرى ميتچ ماككوننەلل مەن چاك شۋمەر قابىلدادى.
“ۋكراينا پرەزيدەنتى سەنات باسشىلارىنا جەڭىس جوسپارىنىڭ ماڭىزدى تۇستارىن اشتى", دەلىنگەن كەزدەسۋ تۋرالى ءباسپاسوز حابارلاماسىندا.
بىراق ول جۋرناليستەردىڭ ء“وزىن قاتتى سىناعان بۇرىنعى پرەزيدەنت، پرەزيدەنتتىككە رەسپۋبليكالىق پارتيادان ۇمىتكەر دونالد ترامپپەن كەزدەسۋدى جوسپارلاپ وتىر ما؟” دەگەن ساۋالىنا جاۋاپ بەرمەدى.
