Qazaqstandyq oqýshy qyzdar endi sabaqqa oramalmen qatysa alatyn boldy, dep habarlaıdy "Adyrna" ulttyq portaly.
Joǵarǵy sot balalardyń bilim alý quqyǵy shektelip jatqanyn atap ótip, bilim berý uıymdaryna bul tyıymdy zańsyz dep tapty.
Bul aqparatty quqyq qorǵaýshy Jaslan Aıtmaǵanbetov Instagram paraqshasynda Joǵarǵy sot oblystyq sottyń sheshimin joqqa shyǵarǵanyn habarlady.
"Joǵarǵy sot qyzdardyń mektepte oramal taqqanyna baılanysty balalardyń bilim alý quqyǵy men oramal máselesine núkte qoıdy. Joǵarǵy Soty oblystyq sottyń sheshimin buzyp, oqýshynyń oramalyna baılanysty shekteýler bilim alý quqyǵyn buzady dep tanydy. Balalardyń quqyqtaryn qorǵaýǵa birneshe zańger men belsendiler qatysty", – deıdi quqyq qorǵaýshy.
Qorǵaýshy bul sheshimdi tórt oblystyń sottary da moıyndaǵanyn habarlady.
"Mınıstrlik oramalmen kúresip jatqanda, Qazaqstanda balalar arasyndaǵy sýııd pen zorlyq-zombylyq kóbeıip ketti. Bul óte ókinishti. Qalaı bolǵanda da sot bıligi mınıstrliktiń ustanymyna emes, zań normalaryna qaraıtyny jaqsy", – dedi ol.
Quqyq qorǵaýshynyń bul jazbasy jelide biraz talqylandy.
"Balaǵa mektepte oramal taǵýdyń qajeti joq dep oılaımyn. Qazir balalar óte qatygez, olar muny mazaq qylýy múmkin. Ekinshiden, bul – qyzdyń emes, ata-anasynyń qalaýy. Qyz óssin, oramal taǵa ma, joq pa, ózi sheshedi”, – dedi jeli qoldanýshysy.
Buǵan deıin oqý-aǵartý mınıstri Ǵanı Beısembaev bilim oshaqtarynda barlyq oqýshynyń mektep formasyn kııýi mańyzdy ekenin aıtqan bolatyn. Ol bilim salasyna qatysty máselelerdi basqa aspektilermen shatastyrmaý keregin túsindirdi.
