Qaraǵandy oblysynda múgedektigi bar adamdar úshin jumys oryndarynyń kvotasy eki esege ulǵaıdy. Jumyspen qamtýdy qamtamasyz etýde memlekettik qoldaýdyń barlyq sharalary qoldanylady. Mysaly, óz isin ashýǵa 61 grant berildi.
– Búginde múgedektigi bar 1120 adam jumyspen qamtýǵa járdemdesýdiń barlyq sharalarymen qamtamasyz etildi. Bos jumys oryndaryna 358 adam jumysqa ornalastyryldy. Áleýmettik jumys oryndaryna 15, qoǵamdyq jumystarǵa – 290 adam joldandy. "Kúmis jas" jobasy boıynsha 106 adam jumys tapty. Sondaı-aq, "Birinshi jumys orny" jobasy, Jastar tájirıbesi jobalary da kómektesedi, – dedi Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova apparattyq keńeste.
Onyń aıtýynsha, bıyl 89 kásiporynda birinshi, ekinshi jáne úshinshi toptaǵy múgedekter úshin 219 jumys ornyna kvota belgilengen. Sonymen qatar, jumys berýshiler múgedektiktiń úshinshi tobyndaǵy estý qabileti buzylǵan adamdar úshin 11 arnaıy jumys orny quryldy. Qaraǵandyda eki jumys ornyna taǵy bir ótinim qol qoıý satysynda.
Kásipkerlik negizderine oqytý "Bastaý Bıznes" jobasy boıynsha júrgiziledi. Bıznes-jobalardy qorǵaǵannan keıin óz isin ashýǵa grant alýǵa múmkindik bar.
Ásem Júnispekova sátti mysaldar keltirdi.
Abaı aýdanynyń Iagodnoe aýylynda turatyn birinshi toptaǵy múgedek Vıktor Kolesnıkov jumyssyz otyrǵan, al qazir kásipker. Óz jylyjaıynda ósirilgen kókónisterdi satady.
Anatolıı Mıasnıkov granttyq qarajatqa lazerlik stanok pen qajetti qural-jabdyqtar satyp aldy. Intererge arnalǵan panel jasaıdy.
Múgedektigi bar jáne olarǵa kútim jasaıtyn adamdar úshin Terrıkon alqabynda ıfrlyq kásipterdi oqytý jobasy jalǵasýda.
Oblys ákimi Ermaǵanbet Bólekpaev jumyspen qamtýdy qoldaýdyń barlyq sharalary týraly halyqqa kóbirek aıtýdy tapsyrdy.
– Múgedek adamdardy jumysqa ornalastyrý boıynsha birqatar sharalar júzege asyryldy. Jumystar júrgizilýde, biraq odan da kóp jumys isteý kerek, – dedi ol.
Qaraǵandy oblysynda múgedektigi bar 55 myńǵa jýyq adam turady, olardyń jartysyna jýyǵy eńbekke jaramdy. Jumysshylar – 11 myńǵa jýyq.
