ساتباەۆ قالاسىندا بالاباقشا بۋحگالتەرى ءوزىنىڭ قىزمەت بابىن پايدالانا وتىرىپ، اسا ءىرى كولەمدە وزىنە سەنىپ تاپسىرىلعان بيۋدجەت قاراجاتىن ۇرلاعان. بۇل تۋرالى بۇگىن، 23 قىركۇيەكتە جوعارعى سوتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
ول 2021-2023 جىلدارى جالاقىسىنا كوەففيتسيەنتىن جاساندى تۇردە ارتتىرىپ، بانكتەگى شوتىنا جالپى سوماسى 15 ميلليوننان استام تەڭگە اۋدارعان. سوتتالۋشى بۇل قىلمىسقا قارىزىن وتەۋ ماقساتىندا بارعانىن ءتۇسىندىردى.
ايەلدىڭ كىناسى ونىڭ مويىنداۋىمەن، كۋانىڭ ايعاقتارىمەن، ساراپتاما قورىتىندىلارىمەن، تولەم قۇجاتتارىمەن، سوتتا زەرتتەلگەن تەرگەۋ جانە جاسىرىن تەرگەۋ ارەكەتتەرىنىڭ حاتتامالارىمەن راستالدى.
«شىنايى وكىنۋى، كەلتىرىلگەن زياندى تولىق وتەۋى جانە اسىراۋىندا ءۇش كامەلەتكە تولماعان بالانىڭ بولۋى جاۋاپكەرشىلىكتى جەڭىلدەتەتىن ءمان-جايلار دەپ تانىلدى.
سوتتالۋشى قىلمىستىق كودەكستىڭ 189-بابىنىڭ 4-بولىگىنىڭ 2) تارماعىمەن كىنالى دەپ تانىلىپ، 7 جىلعا باس بوستاندىعىنان جانە 10 جىلعا مەملەكەتتىك جانە كوممەرتسيالىق ۇيىمداردا تاۋارلىق-ماتەريالدىق قۇندىلىقتارعا بيلىك ەتۋمەن بايلانىستى لاۋازىمداردى اتقارۋ قۇقىعىنان ايىرىلدى. قىلمىستىق كودەكستىڭ 63-بابىنا سۇيەنە وتىرىپ، پروباتسيالىق باقىلاۋ بەلگىلەنىپ، تاعايىندالعان جازا شارتتى دەپ ەسەپتەلەدى»،—دەلىنگەن حابارلامادا.
