AQSh Qazaqstan Úkimetimen jer ýchaskesin alýǵa kelisim jasasqany málim boldy, dep habarlaıdy "Adyrna" ulttyq portaly.
QazTAG málimetinshe, Almaty qalasynan 49 jylǵa jerdi jalǵa alý jobasy maquldanǵan.
«Qazaqstan Respýblıkasynyń Úkimeti men Amerıka Qurama Shtattarynyń Úkimeti arasyndaǵy Amerıka Qurama Shtattarynyń Úkimetine Almaty qalasyndaǵy AQSh-tyń konsýldyq mekemesiniń ǵımaratyn salý úshin jer ýchaskesin jalǵa berý týraly kelisimniń jobasy maquldansyn», – delingen Qazaqstan Úkimetiniń qaýlysynda.
Kelisim jobasyna sáıkes Qazaqstan Úkimeti AQSh Úkimetine Jamaqaeva kóshesi, Ál-Farabı dańǵyly, Seıfýllın dańǵyly, Aldara Kóse kóshesiniń arasynda ornalasqan jer ýchaskesin jalǵa beredi. Ýchaske aýdany – 70 593 sharshy metr.
«Bastapqy 49 jyldyq jaldaý merzimi jáne barlyq keıingi 49 jyldyq jańartý kezeńderi úshin jerdi jalǵa alý aqysy (jalpy uzaqtyǵyna shekteýsiz) $25 301 016 quraıdy jáne osy kelisim kúshine engen kúnnen bastap 30 kúntizbelik kún ishinde bir rettik tólemmen tólenedi», – delingen kelisim jobasynda.
AQSh pen Qazaqstan ekonomıkalyq turǵydan seriktes elder. 2024 jyldyń birinshi jartyjyldyǵynda Qazaqstannan AQSh-qa jiberilgen taýar kólemi 888,8 mıllıon dollarǵa jetkeni habarlandy.
