الماتى وبلىسى، كەگەن اۋىلىندا قۇدىققا ءتۇسىپ قايتىس بولعان ءۇش جەرگىلىكتى تۇرعىننىڭ، ونىڭ ىشىندە 15 جاستاعى ءجاسوسپىرىمنىڭ ولىمىنە قاتىستى تەرگەۋ ءجۇرىپ جاتىر، دەپ حابارلايدى “ادىرنا” ۇلتتىق پورتالى.
كتك تەلەارناسىنىڭ حابارلاۋىنشا، كۋاگەرلەردىڭ ايتۋىنشا، قازا تاپقاندار كارىز قۇدىعىندا جينالعان ۋلى گازدان ۋلانعان.
دەرەككە سۇيەنسەك، 43 جاستاعى ەر ادام 15 جاستاعى ۇلىمەن بىرگە اۋىز سۋدىڭ جوعالۋ سەبەبىن ءبىلۋ ءۇشىن قۇدىققا تۇسكەن. ەكەۋى دە تۇسكەن بويدا ەسىنەن تانىپ قالدى. ولارعا كومەككە 1968 جىلى تۋعان كورشىسى كەلگەنىمەن، ول دا ەسىنەن تانىپ قالعان. ۇشەۋىن دە اۋىل تۇرعىندارى تاۋىپ العان. جەرگىلىكتى تۇرعىندار بۇل وقيعاعا اسفالتتىڭ دۇرىس سالىنباۋى، كارىز قۇدىعىنىڭ قاقپاعى جابىلىپ، وندا ۋلى گاز جينالۋى سەبەپ بولۋى مۇمكىن دەپ كۇدىكتەنەدى.
كەيبىر تۋىستارى ەلەكتر توعى سوعۋى مۇمكىن دەپ بولجام ايتتى. ويتكەنى قۇدىق سۋعا تولى بولعان. قازىر ءولىمنىڭ ناقتى سەبەبىن انىقتاۋ ءۇشىن سوت-مەديتسينالىق ساراپتاما جۇرگىزىلۋدە. مارقۇمداردىڭ مايىتتەرى قوناەۆ قالاسىنىڭ ءمايىتحاناسىنا جەتكىزىلدى.
جەرگىلىكتى بيلىك مارقۇمنىڭ ءتيىستى قىزمەتتەرمەن كەلىسۋسىز جۇمىس جۇرگىزگەنىن، اسفالت توسەگەن مەردىگەردىڭ قازىر اتالمىش جۇمىس ورنىندا جۇمىس ىستەمەيتىنىن راستاپ وتىر.
