Almaty oblysy, Kegen aýylynda qudyqqa túsip qaıtys bolǵan úsh jergilikti turǵynnyń, onyń ishinde 15 jastaǵy jasóspirimniń ólimine qatysty tergeý júrip jatyr, dep habarlaıdy “Adyrna” ulttyq portaly.
KTK telearnasynyń habarlaýynsha, kýágerlerdiń aıtýynsha, qaza tapqandar káriz qudyǵynda jınalǵan ýly gazdan ýlanǵan.
Derekke súıensek, 43 jastaǵy er adam 15 jastaǵy ulymen birge aýyz sýdyń joǵalý sebebin bilý úshin qudyqqa túsken. Ekeýi de túsken boıda esinen tanyp qaldy. Olarǵa kómekke 1968 jyly týǵan kórshisi kelgenimen, ol da esinen tanyp qalǵan. Úsheýin de aýyl turǵyndary taýyp alǵan. Jergilikti turǵyndar bul oqıǵaǵa asfalttyń durys salynbaýy, káriz qudyǵynyń qaqpaǵy jabylyp, onda ýly gaz jınalýy sebep bolýy múmkin dep kúdiktenedi.
Keıbir týystary elektr toǵy soǵýy múmkin dep boljam aıtty. Óıtkeni qudyq sýǵa toly bolǵan. Qazir ólimniń naqty sebebin anyqtaý úshin sot-medıınalyq saraptama júrgizilýde. Marqumdardyń máıitteri Qonaev qalasynyń máıithanasyna jetkizildi.
Jergilikti bılik marqumnyń tıisti qyzmettermen kelisýsiz jumys júrgizgenin, asfalt tósegen merdigerdiń qazir atalmysh jumys ornynda jumys istemeıtinin rastap otyr.
