12 ساۋىرىندە شىمكەنت قالاسىنىڭ قاراتاۋ اۋدانىنداعى تۇران-1 ىقشام اۋدانىندا №10 ءۇي ماڭىندا بولعان قايعىلى وقيعا جۇرتشىلىقتىڭ جۇرەگىن اۋىرتتى. جاڭبىر سۋىنا تولىپ كەتكەن اشىق كارىز قۇدىعىنا قۇلاپ، 6 جاسار بالا قازا تاپتى. مارقۇم بالانىڭ ءبىرىنشى سىنىپ وقۋشىسى ەكەنى بەلگىلى بولدى، دەپ حابارلايدى "ادىرنا" ۇلتتىق پورتالى.
تۇرعىنداردىڭ ايتۋىنشا، كارىز شۇڭقىرى ءبىر جىل بويى اشىق جاتقان. الايدا وسى ۋاقىت ىشىندە ماسەلە شەشىلمەي كەلگەن.
شىمكەنت قالاسى اكىمىنىڭ ورىنباسارى سارسەن قۇرانبەكتىڭ ايتۋىنشا، اتالعان شۇڭقىر قازىرگى قالا اكىمى عابيت سىزدىقبەكوۆ قىزمەتىنە كىرىسپەي تۇرىپ اشىق جاتقان. بۇل ماسەلەنى ەندى ءبىر اي ىشىندە قالپىنا كەلتىرۋ جوسپارلانىپ وتىر.
وسىعان بايلانىستى جاۋاپتى تۇلعالارعا ناقتى شارالار قولدانىلدى. قاراتاۋ اۋدانىنىڭ اكىمى بولىپ ءۇش جىل قىزمەت ەتكەن راقىمبەردى مۇلكەمانوۆ قىزمەتىنەن بوساتىلدى. سالاعا جەتەكشىلىك ەتەتىن قالا اكىمىنىڭ ورىنباسارى قۋانىش اسىلوۆقا سوگىس جاريالاندى. سونىمەن قاتار قالالىق ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسىنا دا قاتاڭ سوگىس بەرىلدى.
قالا بيلىگى وقيعانىڭ سالدارىن جويۋمەن قاتار، وسىنداي جاعدايلاردىڭ قايتالانباۋىن قامتاماسىز ەتۋگە ۋادە بەرىپ وتىر. دەگەنمەن، قايعىلى جاعدايدىڭ الدىن الۋعا بولاتىن ەدى دەگەن پىكىرلەر قوعامدا كەڭ تارالعان.
