الماتى قالاسىنىڭ قىلمىستىق ىستەردى قارايتىن مامانداندىرىلعان اۋدانارالىق سوتىندا اتىشۋلى ءىس بويىنشا سوت وتىرىسى باستالدى. سوتتالۋشىلاردىڭ اراسىندا پسيحولوگيالىق ساۋىقتىرۋ ورتالىعىنىڭ (پسو) بۇرىنعى ءبولىم مەڭگەرۋشىلەرى، قۇقىق قورعاۋ ورگاندارىنىڭ بۇرىنعى قىزمەتكەرلەرى، نوتاريۋستار، جىلجىمايتىن مۇلىك اگەنتتەرى جانە رەتسيديۆيست، جالپى سانى 22 ادام بار، دەپ حابارلايدى «ادىرنا» ءتىلشىسى orda.kz-كە سىلتەمە جاساپ.
باق-تىڭ مالىمەتىنشە، بۇل توپ پسيحيكالىق اۋرۋى بار جالعىزباستى ادامداردى تاۋىپ، ولاردىڭ مۇلىكتەرىن يەمدەنگەن. ولار كەيبىر ناۋقاستاردى قاماۋدا ۇستاپ، پاتەرلەرىن وزدەرىنە جازىپ، ساتىپ جىبەرىپ وتىرعان. ال كەيبىرەۋىن ءتىپتى ءولتىرىپ تاستاعان.
قۇقىق قورعاۋشى، وتباسىلىق جانە مۇراگەرلىك قۇقىق بويىنشا مامان رەنات قادىروۆ ۇيىمداسقان قىلمىستىق توپتىڭ شامامەن 10 جىل بويى پسيحيكالىق اۋرۋى بار ادامداردى ۇنەمى توناپ، ولاردىڭ بوستاندىعىنا قول سۇعىپ، مۇلىكتەرىن الىپ وتىرعانىن مالىمدەدى.
«قىلمىستىق توپ مۇقيات ويلاستىرىلعان سحەمانى قولداندى. ولار ۇرلاعان پسيحيكالىق اۋرۋى بار ادامداردى زاڭسىز جىلجىمايتىن مۇلىك راسىمدەۋ ءۇشىن پايدالانعان. قىلمىستىق توپ جىلجىمايتىن مۇلىكتى جالعان تۇلعالارعا راسىمدەۋمەن ءوز ىستەرىن جاسىرىپ، قىلمىستىق ارەكەتتەرىن زاڭداستىردى. بۇل ولارعا قۇقىق قورعاۋ ورگاندارىنىڭ كۇدىگىن تۋدىرماي، مۇلىكتى باقىلاپ، يەمدەنۋگە مۇمكىندىك بەردى»،—دەيدى مامان.
ايتا كەتەيىك، قىلمىستىق ءىس 2022 جىلدىڭ قاراشا ايىندا قوزعالدى. تەرگەۋ 37 ەپيزودتى ءبولىپ كورسەتتى، ولاردىڭ كوپشىلىگى الماتى قالاسىنداعى تۇرعىن ۇيلەردى زاڭسىز يەلەنۋگە قاتىستى الاياقتىق تۋرالى. «كابلۋكوۆ كوشەسىندەگى پسيحياتريالىق اۋرۋحاناسى» دەگەن اتاۋمەن بەلگىلى پسيحولوگيالىق ساۋىقتىرۋ ورتالىعىنىڭ قىزمەتكەرلەرى قىلمىستىق توپقا كلينيكاداعى جالعىزباستى ناۋقاستاردى كورسەتىپ بەرگەن.
