Almaty qalasynyń qylmystyq isterdi qaraıtyn mamandandyrylǵan aýdanaralyq sotynda atyshýly is boıynsha sot otyrysy bastaldy. Sottalýshylardyń arasynda Psıhologııalyq saýyqtyrý ortalyǵynyń (PSO) burynǵy bólim meńgerýshileri, quqyq qorǵaý organdarynyń burynǵy qyzmetkerleri, notarıýstar, jyljymaıtyn múlik agentteri jáne reıdıvıst, jalpy sany 22 adam bar, dep habarlaıdy «Adyrna» tilshisi orda.kz-ke silteme jasap.
BAQ-tyń málimetinshe, bul top psıhıkalyq aýrýy bar jalǵyzbasty adamdardy taýyp, olardyń múlikterin ıemdengen. Olar keıbir naýqastardy qamaýda ustap, páterlerin ózderine jazyp, satyp jiberip otyrǵan. Al keıbireýin tipti óltirip tastaǵan.
Quqyq qorǵaýshy, otbasylyq jáne muragerlik quqyq boıynsha maman Renat Qadyrov uıymdasqan qylmystyq toptyń shamamen 10 jyl boıy psıhıkalyq aýrýy bar adamdardy únemi tonap, olardyń bostandyǵyna qol suǵyp, múlikterin alyp otyrǵanyn málimdedi.
«Qylmystyq top muqııat oılastyrylǵan shemany qoldandy. Olar urlaǵan psıhıkalyq aýrýy bar adamdardy zańsyz jyljymaıtyn múlik rásimdeý úshin paıdalanǵan. Qylmystyq top jyljymaıtyn múlikti jalǵan tulǵalarǵa rásimdeýmen óz isterin jasyryp, qylmystyq áreketterin zańdastyrdy. Bul olarǵa quqyq qorǵaý organdarynyń kúdigin týdyrmaı, múlikti baqylap, ıemdenýge múmkindik berdi»,—deıdi maman.
Aıta keteıik, qylmystyq is 2022 jyldyń qarasha aıynda qozǵaldy. Tergeý 37 epızodty bólip kórsetti, olardyń kópshiligi Almaty qalasyndaǵy turǵyn úılerdi zańsyz ıelenýge qatysty alaıaqtyq týraly. «Kablýkov kóshesindegi psıhıatrııalyq aýrýhanasy» degen ataýmen belgili Psıhologııalyq saýyqtyrý ortalyǵynyń qyzmetkerleri qylmystyq topqa klınıkadaǵy jalǵyzbasty naýqastardy kórsetip bergen.
