الماتى وبلىسىنىڭ تالعار اۋدانىنا قاراستى پانفيلوۆ اۋىلدىق وكرۋگى اكىمدىگى 212 اعاشتى كەسۋگە بيۋدجەتتەن 6 387 118 تەڭگە قارجى ءبولدى، دەپ حابارلايدى "ادىرنا" ءتىلشىسى satypalu.gov.kz سايتىنا سىلتەمە جاساپ.
تالعار اۋدانىنىڭ پانفيلوۆ اۋىلدىق وكرۋگى اكىمىنىڭ اپپاراتى 16 قىركۇيەك كۇنى "ەكپە اعاشتاردى سانيتارلىق كەسۋ جۇمىستارى" دەگەن تاقىرىپپەن تەندەر جاريالاعان. مەملەكەتتىك ساتىپ الۋدىڭ جەڭىمپازى 23 قىركۇيەك كۇنى انىقتالادى. تەحنيكالىق سيپاتتامادا تاپسىرىس ورىنداۋشى اۋىلدىق وكرۋگ اۋماعىنداعى قۋراعان اپاتتى اعاشتار مەن جول بەلگىلەرىن جاۋىپ قالعان بۇتاقتاردى بۇتاۋعا مىندەتتەلەتىنى، 2024 جىلدىڭ قىركۇيەك پەن قازان ايلارىندا 212 اعاشتى بيىكتىگى 8,5 مەتر بولاتىنداي ەتىپ بىركەلكى كەسىپ شىعاتىنى، قۋراعان اپاتتى بۇتاقتاردان تازالاپ، اعاش قالدىقتارىن ارنايى پوليگونعا اپارىپ توگەتىنى، تەحنيكالىق قاۋىپسىزدىكتى ساقتاۋ قاجەتتىگى، ت.ب تالاپتار كورسەتىلگەن. سونداي-اق، اعاشتاردى وتاماس بۇرىن اۋداندىق ەلەكتر تورابى، تەلەكوممۋنيكاتسيا تورابى، سۋ ارناسى، جول ينسپەكتسيا مەكەمەلەرىمەن كەلىسىم جاساۋ كەرەكتىگى دە ايتىلعان.
تەحنيكالىق سيپاتتاماعا قاراعاندا جۇمىستى اتقارۋشى كومپانيا 212 اعاشتى ءتۇپ-تامىرىمەن تۇتاستاي كەسىپ تاستامايدى. جول بەلگىلەرىن جاۋىپ قالعان بۇتاقتاردى بۇتاپ، قۋراعان اعاشتاردى كەسىپ، تىم بيىكتەپ كەتكەن تەرەكتەردىڭ ۇشىن قىسقارتىپ، بىرقالىپقا تۇسىرەدى. ياعني، 6 387 118 تەڭگەگە بار بولعانى 212 تەرەكتىڭ "قيسىق وسكەن" بۇتاقتارىن بۇتاپ شىعادى دەگەن ءسوز. ەندى ءوزىڭىز ەسەپتەپ كورىڭىز، اۋىلدىق اكىمدىك ءبىر تەرەكتى كەسۋگە بيۋدجەتتەن 30 مىڭ تەڭگەدەن اسا قارجى جۇمساعالى وتىر.
ارينە، مەملەكەتتىك ساتىپ الۋ شارتىنا ساي باعانىڭ بۇدان دا ءسال ارزانداۋى مۇمكىن ەكەنىن جوققا شىعارمايمىز. دەسە دە، ءبىر تەرەكتىڭ قۋراعان بۇتاعىن كەسۋ ءۇشىن بيۋدجەتتەن 30 مىڭ تەڭگەدەن اسا قارجى جۇمساۋ اقىلعا سىيا ما؟ الماتى وبلىسى —جاسىل جەلەك جامىلعان، تال-تەرەگى جايقالعان نۋلى ءوڭىر. ول وڭىردەگى ءار اعاشتىڭ قۋراعان بۇتاعىن 30 مىڭ تەڭگەگە بۇتاتا بەرسەك، حالىق قازىناسىندا قارجى قالا ما؟ بۇل سۇراقتاردى ءتيىستى مەكەمەگە جولدادىق. ولاردان جەتكەن جاۋاپتى الداعى ۋاقىتتا جاريالايتىن بولامىز.
اسىل اباي
"ادىرنا" ۇلتتىق پورتالى
