بيىلعى وقۋ جىلىنان باستاپ 3-سىنىپ وقۋشىلارى ءۇشىن جاڭا باعدارلاما نەگىزىندە ازىرلەنگەن «ەڭبەككە باۋلۋ» پانىنەن جاڭا وقۋلىق ۇسىنىلدى. بۇل تۋرالى «اتامۇرا» باسپاسى ايتتى، دەپ حابارلايدى «ادىرنا» ءتىلشىسى.
اتالعان وقۋلىقتىڭ نەگىزىندە وقۋشىلار «ەڭبەككە باۋلۋ» كۋرسى بويىنشا تەوريالىق ءبىلىم الىپ قانا قويماي، كۇندەلىكتى ومىردە ءجيى قولدانىلاتىن تۇرمىستىق زات ۇلگىلەرىن قولدان جاساۋدى ۇيرەنەدى.
مىسالى، وقۋلىقتىڭ «ساندىك-قولدانبالى ونەر» تاقىرىبى بويىنشا وقۋشىلار قازاقتىڭ ۇلتتىق ويۋ-ورنەكتەرىنىڭ تاريحىمەن، ونىڭ تۇرلەرىمەن، ەرەكشەلىكتەرىمەن تانىسادى. ساباقتا العان بىلىمدەرىن پايدالانا وتىرىپ، وقۋشىلار ءوز قولدارىمەن قازاقى ويۋلاردى ويىپ، قورجىن، كىلەمشە جاساۋدى ۇيرەنەدى.
ساباق بارىسىندا وقۋشىلار اتالعان زاتتاردى جاساۋعا قانداي قۇرالدار قاجەت ەكەندىگىن انىقتاپ، تۇرمىستىق زاتتاردىڭ قانداي ماتەريالداردان تۇراتىنىن (كيىز، بارقىت، بىلعارى، ماتا) وقىپ، ۇيرەنەدى. ءارى وسى ماتەريالداردىڭ تۇرىمەن تانىسادى.
وقۋلىقتاعى ۇلگىلەرگە سايكەس، بالالار ماتانى بۇكتەيدى، قيادى، وعان كەستە سالىپ، ينەمەن جۇمىس ىستەۋگە ماشىقتانادى. كەيىن جاساعان سومكە، قورجىندارىنا «ءمۇيىز»، «قوشقارمۇيىز»، «گۇل»، «وركەش» سياقتى ۇلتتىق ويۋلاردى سالادى. ونى مونشاق پەن زەر سياقتى اشەكەيلەرمەن بەزەندىرەدى. وقۋشىلار ماتانى نەمەسە قاعازدى قيۋ، جابىستىرۋ بارىسىندا قولدارى، ساۋساقتارى يكەمدى بولا تۇسەدى. ەڭبەككە قابىلەتى ارتىپ، شىدامدى، تىڭعىلىقتى بولۋعا، قاجەت نارسەنى ءوزى جاساپ الۋعا جانە اينالاسىن تازا ۇستاۋعا داعدىلانادى. زاتتى ساندەيتىن بوياۋلاردى تاڭداۋ، ويۋلاردى ءدال قاجەت تۇسىنا ورنالاستىرۋ ارقىلى وقۋشىلاردىڭ قيالى داميدى، سۋرەتكەرلىك تالعامى مەن ءتۇرلى تۇستەردى سەزىنۋ قابىلەتى ارتادى.
ەڭبەككە بەيىمدىلىكتى ارتتىرۋمەن قاتار، وقۋشىلار ۇلتتىق قۇندىلىقتارعا – حالقىمىزدىڭ مادەنيەتىنە قۇرمەتپەن قاراۋعا داعدىلانادى. سونىمەن بىرگە، شىعارماشىلىق تاپسىرمالاردى ورىنداۋ بارىسىندا قازاق حالقىنىڭ تاريحى مەن مادەنيەتىمەن تانىسا وتىرىپ، قادىرلەۋدى ۇيرەنەدى.
بىرلەسە وتىرىپ ويۋلى زاتتاردى جاساۋ كەزىندە بالالار جۇپ جانە توپ بولىپ جۇمىس ىستەۋگە ۇيرەنەدى. ءبىر-بىرىمەن پىكىر الماسادى. جاساعان زاتتارىن وتباسىنا، دوستارىنا تارتۋ ەتىپ، ساباق بارىسىندا العان اسەرلەرى مەن بىلىمدەرىمەن بولىسەدى.
وقۋلىقتا:
قوسىمشا ماتەريالداردى قولجەتىمدى ەتەتىن جانە وقۋشىلاردىڭ وقۋ ماتەريالىن يگەرۋگە مۇمكىندىك بەرەتىن QR-كودتار ورنالاسقان;
ساباق اياسىن كەڭەيتۋگە مۇمكىندىك بەرەتىن جانە كىلەمشە مەن قورجىن سياقتى بۇيىمداردى جاساۋدىڭ شىعارماشىلىق بارىسىن كورسەتەتىن ەلەكتروندى نۇسقاسى قوسا بەرىلىپ وتىر، ول بەينەروليكتەر كورسەتۋ، اۋديو جازبالاردى تىڭداتۋ، ءتۇرلى ينتەراكتيۆتى تاپسىرمالاردى ورىنداتۋ ارقىلى وقىتۋدى جان-جاقتى قىزىقتى وتكىزۋگە سەپتىگىن تيگىزەدى.
«بۇل وقۋلىق – وقۋ قۇرالى عانا ەمەس، بالالاردىڭ العان ءبىلىمىن كۇندەلىكتى ومىردە ءوز قولدارىمەن دايىنداپ، پايدالانا الۋدا كومەكشى قۇرال بولارى ءسوزسىز»،—دەيدى باسپا قىزمەتكەرلەرى.
