Bıylǵy oqý jylynan bastap 3-synyp oqýshylary úshin jańa baǵdarlama negizinde ázirlengen «Eńbekke baýlý» páninen jańa oqýlyq usynyldy. Bul týraly «Atamura» baspasy aıtty, dep habarlaıdy «Adyrna» tilshisi.
Atalǵan oqýlyqtyń negizinde oqýshylar «Eńbekke baýlý» kýrsy boıynsha teorııalyq bilim alyp qana qoımaı, kúndelikti ómirde jıi qoldanylatyn turmystyq zat úlgilerin qoldan jasaýdy úırenedi.
Mysaly, oqýlyqtyń «Sándik-qoldanbaly óner» taqyryby boıynsha oqýshylar qazaqtyń ulttyq oıý-órnekteriniń tarıhymen, onyń túrlerimen, erekshelikterimen tanysady. Sabaqta alǵan bilimderin paıdalana otyryp, oqýshylar óz qoldarymen qazaqy oıýlardy oıyp, qorjyn, kilemshe jasaýdy úırenedi.
Sabaq barysynda oqýshylar atalǵan zattardy jasaýǵa qandaı quraldar qajet ekendigin anyqtap, turmystyq zattardyń qandaı materıaldardan turatynyn (kıiz, barqyt, bylǵary, mata) oqyp, úırenedi. Ári osy materıaldardyń túrimen tanysady.
Oqýlyqtaǵy úlgilerge sáıkes, balalar matany búkteıdi, qııady, oǵan keste salyp, ınemen jumys isteýge mashyqtanady. Keıin jasaǵan sómke, qorjyndaryna «Múıiz», «Qoshqarmúıiz», «Gúl», «Órkesh» sııaqty ulttyq oıýlardy salady. Ony monshaq pen zer sııaqty áshekeılermen bezendiredi. Oqýshylar matany nemese qaǵazdy qııý, jabystyrý barysynda qoldary, saýsaqtary ıkemdi bola túsedi. Eńbekke qabileti artyp, shydamdy, tyńǵylyqty bolýǵa, qajet nárseni ózi jasap alýǵa jáne aınalasyn taza ustaýǵa daǵdylanady. Zatty sándeıtin boıaýlardy tańdaý, oıýlardy dál qajet tusyna ornalastyrý arqyly oqýshylardyń qııaly damıdy, sýretkerlik talǵamy men túrli tústerdi seziný qabileti artady.
Eńbekke beıimdilikti arttyrýmen qatar, oqýshylar ulttyq qundylyqtarǵa – halqymyzdyń mádenıetine qurmetpen qaraýǵa daǵdylanady. Sonymen birge, shyǵarmashylyq tapsyrmalardy oryndaý barysynda qazaq halqynyń tarıhy men mádenıetimen tanysa otyryp, qadirleýdi úırenedi.
Birlese otyryp oıýly zattardy jasaý kezinde balalar jup jáne top bolyp jumys isteýge úırenedi. Bir-birimen pikir almasady. Jasaǵan zattaryn otbasyna, dostaryna tartý etip, sabaq barysynda alǵan áserleri men bilimderimen bólisedi.
Oqýlyqta:
qosymsha materıaldardy qoljetimdi etetin jáne oqýshylardyń oqý materıalyn ıgerýge múmkindik beretin QR-kodtar ornalasqan;
sabaq aıasyn keńeıtýge múmkindik beretin jáne kilemshe men qorjyn sııaqty buıymdardy jasaýdyń shyǵarmashylyq barysyn kórsetetin elektrondy nusqasy qosa berilip otyr, ol beınerolıkter kórsetý, aýdıo jazbalardy tyńdatý, túrli ınteraktıvti tapsyrmalardy oryndatý arqyly oqytýdy jan-jaqty qyzyqty ótkizýge septigin tıgizedi.
«Bul oqýlyq – oqý quraly ǵana emes, balalardyń alǵan bilimin kúndelikti ómirde óz qoldarymen daıyndap, paıdalana alýda kómekshi qural bolary sózsiz»,—deıdi baspa qyzmetkerleri.
