WRO - 2024 حالىقارالىق وليمپياداسىنىڭ رەسپۋبليكالىق كەزەڭىندە تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىلارى ءۇش مارتە جەڭىمپاز اتاندى.
روبوتتار جارىسى NIS الماتى بازاسىندا ءوتتى. بايقاۋعا ەلىمىزدىڭ تۇپكىر تۇپكىرىنەن 272 وقۋشى قاتىستى. ەكى كۇن بويى 136 كوماندا RoboMission, Future Innovators, RoboSports جانە Future Engineers ساناتتارىندا باق سىنادى.
6 - سىنىپ وقۋشىلارى الينۋر ريناتۇلى، نۇرالي نۇرجان Future Innovators Elementary ساناتىنداعى "Scorpius" روبوت تازالاۋشىسىن كورسەتتى. ازىرلەۋشىلەردىڭ ايتۋىنشا، جوبا قالا كوشەلەرىندەگى تۇرمىستىق قوقىستاردى تازالاۋعا ارنالعان.
قوقىس ادامزاتتىڭ ماڭىزدى ماسەلەلەرىنىڭ ءبىرى. بارلىق قالالاردىڭ كوشەلەرىندە كوپتەگەن قوقىستار بار، ولار ينفەكتسيالار مەن زيانكەستەردىڭ تارالۋ ورتالىعىنا اينالادى. ءبىزدىڭ روبوت كوممۋنالدىق قىزمەتتەرگە كومەككە كەلە الادى. ونىڭ قوقىس جينايتىن ششەتكاسى مەن كونتەينەرى بار. روبوت تازالاۋشى پروتوتيپ ساتىسىندا، بىراق قازىر ول ۇساق قوقىستاردى جيناي الادى، - دەپ ءتۇسىندىردى وقۋشىلار.
ورمانداردى قالپىنا كەلتىرۋ ءۇشىن اۆتونومدى روبوتتى 11-12 سىنىپ وقۋشىلارى ينكار قۇرمانباەۆا مەن ايىم باۋىرجانقىزى قۇراستىرعان. ولار Future Innovators Senior ساناتىندا ونەر كورسەتتى. ءبىر تسيكلدە روبوت 60 كوشەت وتىرعىزا الادى. روبوت كەز-كەلگەن توپىراقتا جۇمىس ىستەي الادى جانە شىنجىر تاباندى ءشاسسيدىڭ ارقاسىندا كۇردەلى رەلەفتە جۇرە الادى.
بۇل جوبا - تولىق ولشەمدى، دايىن روبوت، ونى ءدال قازىرر پراكتيكا جۇزىندە ورمان وتىرعىزۋ قاجەت جەرلەردە قولدانۋعا بولادى. روبوتتى باسقارۋ جاساندى ينتەللەكت نەگىزىندە اۆتونومدى تۇردە جۇزەگە اسىرىلادى، — دەيدى ازىرلەۋشىلەر.
ايتا كەتسەك، بۇل جوبا تەك اعاش وتىرعىزىپ قانا قويماي، ورماننىڭ قالاي وسەتىنى تۋرالى بولجام جاسايدى، سونىمەن قاتار تابيعاتتى قوقىستاردان تازارتادى. ەگەر قوقىس تابىلسا، روبوت اۆتوماتتى تۇردە مانيپۋلياتوردىڭ كومەگىمەن قوقىستى جينايدى.
10 - سىنىپ وقۋشىلارى سەرجان قادىلبەك، اقنيەت مولداكەرىموۆ Future Innovators Junior ساناتىندا جوعارى پيلوتاجدى كورسەتتى.
زياتكەرلەر قۇتقارۋ روبوت قايىعىن جاسادى. جوبا كاتاماران قايىعىنىڭ ءپروتوتيپى بولىپ تابىلادى، ول جاساندى ينتەللەكت ارقىلى قيىندىقتا قالعان ادامداردى اۆتوماتتى تۇردە تابا الادى جانە جىلجىمالى باسپالداقتار ارقىلى ولاردى سۋدان نەمەسە شاتىردان شىعارىپ قۇتقارا الادى. قايىقتىڭ بورتىندا العاشقى كومەك قۇرالدارى بار.
وسى كوكتەمدە قازاقستان بۇرىن-سوڭدى بولماعان سۋ تاسقىنىنا تاپ بولدى، كوپتەگەن ەلدى مەكەندەر تولىعىمەن سۋ استىندا قالدى. روبوت سۋ باسقان ەلدى مەكەندەردى اۆتونومدى تۇردە كۇزەتىپ، ادامداردى قۇتقارا الادى، — دەپ قورىتىندىلادى جوبا اۆتورلارى.
ايتا كەتسەك، «نازارباەۆ زياتكەرلىك مەكتەپتەرى» دببۇ – 2014 جىلدان بەرى World Robot Olympiad حالىقارالىق روبوتوتەحنيكا وليمپياداسىنىڭ قازاقستانداعى ۇلتتىق ۇيىمداستىرۋشىسى. 10 جىل ىشىندە NIS ەلىمىزدەگى روبوتوتەحنيكا سالاسىنىڭ دامۋىنا جانە وتاندىق كوماندالاردىڭ حالىقارالىق دەڭگەيدەگى جەتىستىكتەرىنە ايتارلىقتاي ۇلەس قوستى.
