بۇگىن كورنەكتى قالامگەر، اۋدارماشى، كينواكتەر ءساتىمجان سانباەۆتىڭ تۋعانىنا 85 جىل تولدى، دەپ حابارلايدى «ادىرنا» ءتىلشىسى.
ول 1939 جىلى 16 قىركۇيەكتە قازىرگى اتىراۋ وبلىسىنىڭ، ماقات سەلوسىندا ومىرگە كەلگەن. ورىنبور اۋىل شارۋاشىلىعى ينستيتۋتىن، كسرو جازۋشىلار وداعى جانىنداعى جوعارى ادەبي كۋرستى تامامداعان.
ءار جىلداردا اتىراۋ وبلىسىنىڭ ەنگەلس سوۆحوزىندا باس ينجەنەر، پاۆلودار تراكتور زاۋىتىندا ينجەنەر-كونسترۋكتور، بالقاش كەن-مەتاللۋرگيا كومبيناتىندا ينجەنەر، «جازۋشى» باسپاسىندا رەداكتسيا مەڭگەرۋشىسى، ازيا-افريكا ەلدەرى جازۋشىلارىمەن بايلانىس جونىندەگى قازاق كوميتەتىندە جاۋاپتى حاتشى، قازاقستان جازۋشىلار وداعىندا ادەبي كەڭەسشى، «نەۆادا-سەمەي» قوزعالىسىندا ۆيتسە-پرەزيدەنت، ش.ايمانوۆ اتىنداعى ۇلتتىق كينوكومپانيادا باس رەداكتور بولىپ جەمىستى قىزمەت اتقارعان.
شىعارمالارىن ورىس تىلىندە جازاتىن ءساتىمجان سانباەۆتىڭ العاشقى پوۆەستەرى «ي ۆەچنىي بوي»، «بەلايا ارۋانا» 1968 جىلى «پروستور» جۋرنالىندا جارىق كورگەن. قالامگەردىڭ قالامىنان تۋعان «بەلايا ارۋانا»، «دوروگا تولكو ودنا»، «ارۋانا»، «كولودتسى زنوينىح دولين»، «ۆرەمەنا گودا ناشەي جيزني»، «كوگدا جاجدۋت ميفا»، «مەدنىي كولوسس» سياقتى كىتاپتارى وقىرمان قاۋىم مەن سىنشىلاردان جوعارى باعاسىن العان.
شىعارمالارى قازاق تىلىنە، سونداي-اق، كوپتەگەن شەتەل تىلدەرىنە اۋدارىلعان.
«فلاكون ودەكولونا» اتتى دراماسى رەسپۋبليكا تەاترلارىندا تابىستى قويىلىپ ءجۇر. ونىڭ كينو سالاسىنداعى ەڭبەگى دە وراسان. «ۇشى-قيىرسىز جول»، «توي بولاردا»، «شوقان ءۋاليحانوۆ»، «باتىر بايان» كوركەم فيلمدەرىندە باستى رولدەردە ويناعان. «قىز جىبەك»، «ىستىقكول قىزعالداقتارى» كينوفيلمدەرىن ءساتتى اۋدارعان. «تام، گدە گورى بەلىە»، «دوم ۋ سولەنوگو وزەرا» كينوفيلمدەرىنىڭ اۆتورى. ابايدىڭ قاراسوزدەرىن، م.اۋەزوۆتىڭ، س.بەگاليننىڭ، ءا.سارسەنباەۆتىڭ، ق.ىسقاقتىڭ، تاعى دا باسقا قازاق جازۋشىلارىنىڭ شىعارمالارىن ورىس تىلىنە تارجىمالاعان.
«ەڭبەكتەگى ەرلىگى ءۇشىن» مەدالىمەن، «قۇرمەت» وردەنىمەن ماراپاتتالعان.
