Búgin kórnekti qalamger, aýdarmashy, kınoakter Sátimjan Sanbaevtyń týǵanyna 85 jyl toldy, dep habarlaıdy «Adyrna» tilshisi.
Ol 1939 jyly 16 qyrkúıekte qazirgi Atyraý oblysynyń, Maqat selosynda ómirge kelgen. Orynbor aýyl sharýashylyǵy ınstıtýtyn, KSRO Jazýshylar odaǵy janyndaǵy Joǵary ádebı kýrsty támamdaǵan.
Ár jyldarda Atyraý oblysynyń Engels sovhozynda bas ınjener, Pavlodar traktor zaýytynda ınjener-konstrýktor, Balqash ken-metallýrgııa kombınatynda ınjener, «Jazýshy» baspasynda redakııa meńgerýshisi, Azııa-Afrıka elderi jazýshylarymen baılanys jónindegi Qazaq komıtetinde jaýapty hatshy, Qazaqstan Jazýshylar odaǵynda ádebı keńesshi, «Nevada-Semeı» qozǵalysynda vıe-prezıdent, Sh.Aımanov atyndaǵy ulttyq kınokompanııada bas redaktor bolyp jemisti qyzmet atqarǵan.
Shyǵarmalaryn orys tilinde jazatyn Sátimjan Sanbaevtyń alǵashqy povesteri «I vechnyı boı», «Belaıa arýana» 1968 jyly «Prostor» jýrnalynda jaryq kórgen. Qalamgerdiń qalamynan týǵan «Belaıa arýana», «Doroga tolko odna», «Arýana», «Kolody znoınyh dolın», «Vremena goda nasheı jıznı», «Kogda jajdýt mıfa», «Mednyı koloss» sııaqty kitaptary oqyrman qaýym men synshylardan joǵary baǵasyn alǵan.
Shyǵarmalary qazaq tiline, sondaı-aq, kóptegen shetel tilderine aýdarylǵan.
«Flakon odekolona» atty dramasy respýblıka teatrlarynda tabysty qoıylyp júr. Onyń kıno salasyndaǵy eńbegi de orasan. «Ushy-qıyrsyz jol», «Toı bolarda», «Shoqan Ýálıhanov», «Batyr Baıan» kórkem fılmderinde basty rólderde oınaǵan. «Qyz Jibek», «Ystyqkól qyzǵaldaqtary» kınofılmderin sátti aýdarǵan. «Tam, gde gory belye», «Dom ý solenogo ozera» kınofılmderiniń avtory. Abaıdyń qarasózderin, M.Áýezovtiń, S.Begalınniń, Á.Sársenbaevtyń, Q.Ysqaqtyń, taǵy da basqa qazaq jazýshylarynyń shyǵarmalaryn orys tiline tárjimalaǵan.
«Eńbektegi erligi úshin» medalimen, «Qurmet» ordenimen marapattalǵan.
