V دۇنيەجۇزىلىك كوشپەندىلەر ويىندارى اياقتالدى. قازاقستاننىڭ ۇلتتىق قۇراماسى 44 التىن، 33 كۇمىس، 37 قولا جۇلدە الىپ، كوماندالىق ەسەپتە ءبىرىنشى ورىنعا يە بولدى، دەپ حابارلايدى “ادىرنا” ۇلتتىق پورتالى.
جارىستىڭ سوڭعى كۇنىندە ۇلتتىق قۇراما سپورتشىلارى 11 التىن، 9 كۇمىس، 9 قولا جۇلدە جەڭىپ الدى. «قازانات» يپپودرومىندا وتكەن بايگەدەن قازاقستان 18 جۇلدەگە يە بولدى: 6 التىن، 7 كۇمىس، 5 قولا.
ايتا كەتەيىك، 5-ءشى دۇنيەجۇزىلىك كوشپەندىلەر ويىندارى 2024 جىلدىڭ 8-13 قىركۇيەگى ارالىعىندا استانادا ءوتتى.
تۋريزم جانە سپورت مينيسترلىگىنىڭ حابارلاۋىنشا، يپپودروم ماڭىنداعى ەتنواۋىلدا وتكەن تەڭگە ىلۋدەن جەتى قۇت ستيلىنەن باقىت ءتولتاي التىن جۇلدە الدى.
ەتنواۋىلدا قۇسبەگىلىكتەن وتكەن اقتىق سىندا بۇركىت سالۋدان سەرىكبەك كۇنتۋعان التىن جۇلدەگە يە بولدى. ال كۇمىستى ەرجان بايقاداموۆ، قولا جۇلدەنى ارمان قوشقاروۆ يەلەندى. يتەلگى سالۋدان باعدات كەۋەنوۆ قولا جۇلدە يەلەندى.
«الاۋ» مۇز سارايىندا وتكەن قىرعىز حالقىنىڭ ۇلتتىق ويىنى وردودان اقتىق سىندا قازاقستان قۇراماسى 96:18 ەسەبىمەن قىرعىزستان سپورتشىلارىنا ەسە جىبەرىپ، كۇمىس جۇلدە الدى.
«دۋمان» قوناق ءۇي جانە سپورت كەشەنىندە وتكەن تۇرىك حالقىنىڭ زياتكەرلىك وي̆ىنى مانگالادان ايەلدەر اراسىندا قۇندىز ەسىركەپ التىن جۇلدە السا، ايكەرىم قۋانىشبەكوۆا قولا جۇلدەگە يە بولدى. ەرلەر اراسىندا بيعالي زكيرياەۆ التىن مەدال السا، ازامات قايداروۆ قولا جۇلدە ەنشىلەدى. ال كوماندالىق ەسەپتە قازاقستان قۇراماسى ءبىرىنشى ورىنعا يە بولدى.
