V Dúnıejúzilik Kóshpendiler oıyndary aıaqtaldy. Qazaqstannyń ulttyq quramasy 44 altyn, 33 kúmis, 37 qola júlde alyp, komandalyq esepte birinshi orynǵa ıe boldy, dep habarlaıdy “Adyrna” ulttyq portaly.
Jarystyń sońǵy kúninde ulttyq qurama sportshylary 11 altyn, 9 kúmis, 9 qola júlde jeńip aldy. «Qazanat» ıppodromynda ótken báıgeden Qazaqstan 18 júldege ıe boldy: 6 altyn, 7 kúmis, 5 qola.
Aıta keteıik, 5-shi Dúnıejúzilik kóshpendiler oıyndary 2024 jyldyń 8-13 qyrkúıegi aralyǵynda Astanada ótti.
Týrızm jáne sport mınıstrliginiń habarlaýynsha, ıppodrom mańyndaǵy etnoaýylda ótken teńge ilýden jeti qut stılinen Baqyt Tóltaı altyn júlde aldy.
Etnoaýylda qusbegilikten ótken aqtyq synda búrkit salýdan Serikbek Kúntýǵan altyn júldege ıe boldy. Al kúmisti Erjan Baıqadamov, qola júldeni Arman Qoshqarov ıelendi. Itelgi salýdan Baǵdat Keýenov qola júlde ıelendi.
«Alaý» muz saraıynda ótken qyrǵyz halqynyń ulttyq oıyny ordodan aqtyq synda Qazaqstan quramasy 96:18 esebimen Qyrǵyzstan sportshylaryna ese jiberip, kúmis júlde aldy.
«Dýman» qonaq úı jáne sport kesheninde ótken túrik halqynyń zııatkerlik oı̆yny mangaladan áıelder arasynda Qundyz Esirkep altyn júlde alsa, Aıkerim Qýanyshbekova qola júldege ıe boldy. Erler arasynda Bıǵalı Zkırıaev altyn medal alsa, Azamat Qaıdarov qola júlde enshiledi. Al komandalyq esepte Qazaqstan quramasy birinshi orynǵa ıe boldy.
