استانا قالاسىندا Qazbilim ۇلتتىق ليتسەيىنىڭ توعىزىنشى مەكتەبىنىڭ تۇساۋكەسەرى ءوتتى. ۇلتتىق مەكتەپتىڭ اشىلۋىنا ءماجىلىس دەپۋتاتتارى مەن استانالىق زيالى قاۋىم وكىلدەرى قاتىستى. جيىندا ايتۋلى ايتىسكەر رۇستەم قايىرتايۇلى ءوزىنىڭ جۇرەكجاردى ارناۋىن ايتسا، شاحاريزات سەيداحمەت اننەن شاشۋ شاشتى.
سالتاناتتى شاراعا قر ءماجىلىس دەپۋتاتتارى – ءاشىمجان جاناربەك، اسحات ايماعامبەتوۆ، سامات نۇرتازا، جوعارى ءبىلىم جانە عىلىم ءمينيسترىنىڭ كەڭەسشىسى – رۋسلان ەمەلباەۆ، استانا قالاسى اكىم اپپارات باسشىسىنىڭ ورىنباسارى – جومارت ايتقازى، بەلگىلى ايتىسكەرلەر – سەرىكزات دۇيسەنعازى، ءانشى شاحاريزات، تىلشىلەر مەن بلوگەرلەر – ەركىن قامبارۇلى، وركەن كەنجەبەك جانە ت.ب. ەلگە بەلگىلى، ۇلتقا جاناشىر ازاماتتارى قاتىسىپ، تىلەكتەستىگىن ءبىلدىردى.
الماتى، شىمكەنت، قىزىلوردا، قاراعاندى، اقتاۋ، قوستاناي، اتىراۋ قالالارىنان اشىلعان ۇلتتىق ليتسەيلەرى بيىل استانادا جالعاسىن تاۋىپ، بوي كوتەردى. وقۋشىعا ءارى ساپالى ءبىلىم، ءارى ۇلتتىق تاربيە بەرەتىن وردانىڭ اشىلعانى ەلوردالىقتار ءۇشىن جاقسى جاڭالىق بولدى.
جاناربەك ءاشىمجان اياتجان احمەتجانۇلى اشقان ۇلتتىق مەكتەپتىڭ ۇلت بولاشاعى ءۇشىن ماڭىزى زور ەكەنىن ايتىپ، وقۋشىلارعا ليتسەيدە ساپالى ءبىلىم الۋعا شاقىردى. ال قر پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ بولسا، ۇلتتىق مەكتەپتى اشۋدىڭ وڭاي بولماعانىن ەسكەرتتى.
«اياتجان احمەتجانعا جەكەمەنشىك ۇلتتىق مەكتەپ اشۋ وڭاي بولعان جوق. ونى facebook الەۋمەتتىك جەلىسىنەن كورىپ وتىرعان شىعارسىزدار. بىراق بۇل ماسەلەنىڭ شەت جاعاسى عانا، ايتا بەرسەك، مەكتەپ اشۋدىڭ اڭگىمەسى كوپ. قازىرگى ۋاقىتتا مەكتەپ اشۋ وڭاي شارۋا ەمەس. بىراق اۋىر قيىندىقتارعا مويىماي، بىرنەشە وڭىردە اياتجان احمەتجانۇلى ۇلتتىق مەكتەپتى اشىپ وتىر.
بۇگىن استانانىڭ تورىندە «Qazbilim» ۇلتتىق ليتسەيىن اشىپ وتىر. ءبىز اياتجان احمەتجانۇلىنىڭ ءبىلىم سالاسىندا ۇلكەن ەڭبەك ەتىپ جۇرگەنىن جاقسى بىلەمىز. ءبىر سوزبەن ايتقاندا ول جۇرەگى قازاق دەپ سوققان ازامات. قازاقتىڭ ۇلتتىق قۇندىلىقتارىن بالالارعا سىڭىرەمىن دەپ ۇلتتىق مەكتەپ اشىپ جاتىر. بۇل تەك اياتجاننىڭ قۋانىشى ەمەس، بارلىعىمىزدىڭ قاۋانىشىمىز دەپ بىلەمىن»، – دەدى ول.
«QAZBILIM GROUP» كومپانياسى باسقارما توراعاسى اياتجان احمەتجانۇلىنىڭ ايتۋىنشا، ۇلتتىق ليتسەي تازا قازاق تىلىندە تەرەڭدەتە ءبىلىم بەرەدى.
«وقۋشىلارعا ساپالى ءبىلىم بەرۋمەن قاتار جان-جاقتى قالىپتاسۋى ءۇشىن ۇلتتىق تاربيە; ءبىرتۇتاس QAZBILIM اۆتورلىق مەتوديكاسى; پاندىك وليمپياداعا باعدارلى دايىندىق; ۇبت-عا كەشەندى دايىندىق; قازاقستاندىق جانە شەتەلدىك ۇزدىك ۋنيۆەرسيتەتتەرگە تۇسۋگە باعىت-باعدار جانە كەپىلدىك; IELTS-قا دايىندىق; قارجىلىق ساۋاتتىلىق; دومبىرا، جەتىگەن، ت.ب. ۇلتتىق اسپاپتار ۇيىرمەسى; سپورت ۇيىرمەسى; شاحمات، توعىزقۇمالاق، ت.ب. ينتەللەكتۋالدى ويىندار ارقىلى ءارتۇرلى شارالار ۇيىمداستىرىپ، ءبىلىمدى تەك تەوريا جۇزىندە عانا ەمەس، تاجىريبەمەن ۇشتاستىرۋعا كوبىرەك ءمان بەرىلەدى.
استاناداعى ليتسەي 700 وقۋشىعا ارنالعان. جاڭا كومپيۋتەرلىك تەحنيكامەن، ينتەراكتيۆتى ەلەكتروندى تاقتالارمەن، مۋلتيمەديالىق جانە STEM كابينەتتەرىمەن جابدىقتالعان. جەكە كىتاپحاناسى بار. بالالار ءۇشىن بارلىق جاعداي جاسالعان. ولاردىڭ دەمالاتىن، تاماقتاناتىن ورنى، ساباق وقيتىن كابينەتتەرى تالاپقا ساي جاساقتالعان. بالالار توپتىق جۇيە بويىنشا وقىتىلادى. ۇستازدار جوعارى، ءبىرىنشى، ەكىنشى ساناتتى پەداگوگتار. شەتەلدە، نازارباەۆ ۋنيۆەرسيتەتىندە ءبىلىم العان ماماندار قىزمەتكە تارتىلعان. وقۋلىقتار جەتكىلىكتى»، — دەيدى «QAZBILIM GROUP» كومپانياسى باسقارما توراعاسى اياتجان احمەتجانۇلى.
وسى كەزگە دەيىن وڭ مىڭنان استام دارىندى شاكىرتكە ءبىلىم بەرىپ، ۇلكەن جەتىستىكتەرگە قول جەتكىزگەن Qazbilim – 8 قالادا ليتسەي، 1 قالادا ءبىلىم بەرۋ ورتالىعى بولىپ، ۇلكەن ءبىلىم ورداسىنا اينالعان ىرگەلى ۇجىم.
