بۇگىن - فۋتبولسۇيەر قاۋىم ءۇشىن ماڭىزدى كۇن. سەبەبى الماتىداعى ورتالىق ستاديوندا قازاقستان مەن نورۆەگيا قۇراماسى كەزدەسەدى.
6 قىركۇيەك كۇنى 19:00-دە باستالاتىن ويىن ءۇشىن قالا ىشىندە ۇلكەن كەپتەلىس تۇستە باستالدى. ودان بولەك، الماتى اكىمدىگى جاسىل الاڭدا وتەتىن ويىن كورەرمەندەرىنە ۇندەۋ جاسادى. اكىمدىك پەن سپورت باسقارماسى كورەرمەنننىڭ بيلەتتە كورسەتىلگەن ۋاقىتتان ەرتە جينالۋىن سۇراپ، حابارلاما جولداعان.
«ۋەفا ۇلتتار ليگاسىنىڭ ماتچى 6 قىركۇيەك كۇنى ساعات 19:00-دە الماتىنىڭ ورتالىق ستاديونىندا وتەدى. ستاديونعا كىرە بەرىستە كەزەك پەن حالىق كوپ جينالماس ءۇشىن، جانكۇيەرلەردى ستاديونعا ويىن باستالۋىنا ەكى ساعات قالعاندا كەلۋلەرىن سۇرايمىز»، - دەلىنگەن حابارلامادا.
بيلەتتەر ءبىر كۇندە ساتىلدى
قازاقستان - نورۆەگيا ۇلتتار ليگاسى ماتچى تىكەلەي ترانسلياتسيا ارقىلى Qazsport ارناسىندا دا كورسەتىلمەك. الايدا قۇرامانىڭ جانكۇيەرلەرى مەن الىپ ساتارلار بيلەتتەردى جاپپاي ساتىپ العان. بيلەتتەرگە اشىق ساتىلىم باستالعاننان-اق ونلاين ساتۋ سايتى 20 ساعاتتان سوڭ ىستەن شىققان. بيلەتتەر كاسساعا جەتكىزىلمەگەنى تۋرالى دا اقپارات تاراعان. ال 5-6 قىركۇيەك كۇندەرى كاسساعا بيلەت سۇراي كەلگەن ادامدى الىپ ساتارلار كۇتىپ الىپ ءجۇر. ونلاين جۇيەلەردە دە بيلەت باعاسى 3 ەسەگە شارىقتاعان.
«بيلەت ساتامىن، باعاسى 30 مىڭ تەڭگە»، «نورۆەگيا – قازاقستان ويىنىنا بيلەتتەر 20 مىڭ» دەگەن جىلتىر جارناما بارلىق جەلىدە ءجۇر.
ال رەسمي سايتتا بيلەتتىڭ باعاسى 2 مىڭ مەن 10 مىڭ تەڭگە اراسى دەپ كورسەتىلگەن.
«نورۆەگيا ءۇشىن قيىن بولماق»
Sport.kz سايتىنا سۇحبات بەرگەن قازاقستاندىق فۋتبول مامانى الماس قۇلشىنباەۆ ماتچ نورۆەگيا قۇراماسىنىڭ ەنشىسىنە شەشىلۋى مۇمكىن دەپ بولجادى.
«مەن كوماندالاردىڭ جەڭىسكە جەتۋ مۇمكىندىگىن نورۆەگيا قۇراماسىنىڭ پايداسىنا 60-40 پايىزعا دەيىن باعالايمىن. بىراق ماتچتىڭ ناتيجەسىنە كليمات، اۋا-رايى جانە باسقا دا فاكتورلار اسەر ەتۋى مۇمكىن. ونىڭ ۇستىنە بۇل قازاقستان ءۇشىن چەرچەسوۆتىڭ جەتەكشىلىگىمەن ەموتسيونالدى فون قوساتىن العاشقى ويىن. بۇل نورۆەگيا ءۇشىن وتە قيىن ماتچ بولماق. ءبىزدىڭ كوماندانىڭ كەم دەگەندە جەڭىلىپ قالماۋعا تولىق مۇمكىندىگى بار. ەۋروپا چەمپيوناتىنىڭ ىرىكتەۋ ويىندارى قازاقستاندا ويناۋ بارلىعىنا قيىن ەكەنىن كورسەتتى»، - دەدى مامان.
«ۇلتتىق قۇرامانى قولداۋعا كەلەسىڭدەر مە، الدە حوللاندتى كورۋگە مە؟»
باس باپكەر چەرچەسوۆ ستانيسلاۆ پەن ۇلتتىق قۇراما كاپيتانى اسحات تاعىبەرگەن كەشە باق وكىلدەرىنىڭ باسىن قوسىپ، ويىن الدىنداعى ەسەبىمەن بولىسكەن ەدى.
«استانا بولسىن، الماتى بولسىن، بۇل قازاقستان عوي، ءبىزدىڭ ەلىمىز. مۇندا تابيعي ءشوپ بار، الماتىدا ءوز ارتىقشىلىقتارى بار، استانادا وزىنىكى. قاي جەردە بولماسىن ءبىز جەڭىسكە ۇمتىلامىز. بۇل ويىنعا بارىنشا دايىندالىپ جاتىرمىز جانە ەرتەڭ بار كۇشىمىزدى سالامىز»، – دەدى تاعىبەرگەن.
سونداي-اق، قازاقستاندىقتار قارسى كوماندانىڭ ويىنشىلارى ەلگە كەلگەندە كۇتىپ الىپ، حوللاندقا ەرەكشە ىقىلاس تانىتقان ەدى. باق وكىلدەرىنە سۇحبات بەرگەن ۇلتتىق قۇرامانىڭ كاپيتانى جانكۇيەرلەرگە دە ەسكەرتۋ ايتتى.
«نورۆەگيالىق ويىنشىلاردىڭ تاجىريبەسى ەشقانداي قيىندىق تۋدىرمايدى دەپ ويلايمىن. ءبىز ءوز ويىن مانەرىمىزدى كورسەتەمىز. ماعان كوپتەن بەرى حابارلاسپاي كەتكەن ادامدار حابارلاسىپ مەنەن ويىنعا بيلەت سۇراپ جاتىر، مەن ولارعا: سەندەر ۇلتتىق قۇرامانى قولداۋعا كەلەسىڭدەر مە، الدە حوللاندتى كورۋگە مە؟ دەيمىن. سوندىقتان، ءبىز ءۇشىن جانكۇيەرلەردىڭ قولداۋى ماڭىزدى » – دەدى قازاقستان قۇراماسىنىڭ كاپيتانى.
قازاقستان مەن نورۆەگيا اراسىنداعى ماتچ بۇگىن، 6 قىركۇيەك كۇنى ساعات 19:00-دە الماتىداعى ورتالىق ستاديوندا وتەدى.
سىمبات ناۋحان
«ادىرنا» ۇلتتىق پورتالى
