دەبات تۋرنيرلەرىنىڭ جەڭىمپازدارى مەن جۇلدەگەرلەرى قوماقتى اقشالاي سىيلىقتار مەن ءبىلىم گرانتىن الادى. بيىل قازاقستاننىڭ 6 جوعارى وقۋ ورنى 12 پىكىرسايىسشى تۇلەككە ءبىلىم گرانتىن بەردى. بۇل تۋرالى ءبىلىم جانە عىلىم مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
دەبات ءتۋرنيرىنىڭ 12 جەڭىمپازى قورقىت اتا اتىنداعى ۋنيۆەرسيتەت، س.امانجولوۆ اتىنداعى شقۋ، ح.دوسمۇحامەتوۆ اتىنداعى اتىراۋ ۋنيۆەرسيتەتى، تۇران ۋنيۆەرسيتەتى، Satbayev University جانە نارحوز ۋنيۆەرسيتەتىندە وقۋعا گرانت الدى. ودان بولەك ولار تۋرنيرلەرگە قاتىسقانى ءۇشىن گراموتالارمەن، كۋبوكتارمەن جانە 200 مىڭنان 500 مىڭ تەڭگەگە دەيىن اقشالاي سىيلىقتارمەن ماراپاتتالادى.
ءبىلىم جانە عىلىم مينيسترلىگى دەباتتى كەڭىنەن ناسيحاتتاۋ بويىنشا بەلسەندى جۇمىس جۇرگىزىپ كەلەدى. بۇگىنگى تاڭدا ەلىمىزدە 120 944 ادامدى قامتيتىن 6 778 دەبات كلۋبى بار. ولاردىڭ اراسىندا وقۋشىلار دا، ستۋدەنتتەر دە بار.
"ەكى جىل بۇرىن 4 405 مەكتەپ جانە ستۋدەنتتىك كلۋبتا 66 186 پىكىرسايىسشى بولسا، بۇگىندە ولاردىڭ سانى 120 مىڭنان استى. ولار سىندارلى تالقىلاۋ ونەرىن ۇيرەنەدى، باسقا دەباتشىلارمەن دوستىق جانە سىيلاستىق قارىم-قاتىناس ورناتادى. سونداي-اق ولار وي-ءورىسىن كەڭەيتىپ، شىعارماشىلىق بەلسەندىلىگىن ارتتىرادى. بيىل بالالار جىلى اياسىندا بەس دەبات ءتۋرنيرى ۇيىمداستىرىلادى", - دەپ ءتۇسىندىردى مينيسترلىكتىڭ رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ ديرەكتورى رايسا شەر.
بۇگىندە بەس دەبات ءتۋرنيرىنىڭ ەكەۋى وتكىزىلگەن. ولارعا 500-گە جۋىق وقۋشى مەن ستۋدەنت قاتىسىپ، كامەلەتكە تولماعانداردى وقىتۋ، تاربيەلەۋ جانە ولاردىڭ قۇقىعىن قورعاۋدىڭ ماڭىزدى ماسەلەلەرىن كوتەرەدى.
“ادىرنا” ۇلتتىق پورتالى
