قازاقستان رەسپۋبليكاسى ءپىب پرەزيدەنتتىك ورتالىعىندا قازاقستان رەسپۋبليكاسىنىڭ پرەزيدەنتى ق.ق.توقاەۆتىڭ 2024 جىلعى 2 قىركۇيەكتەگى «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» جولداۋىن تالقىلاۋعا ارنالعان دوڭگەلەك ۇستەل ءوتتى.
ءىس-شارانىڭ ماقساتى – ەلىمىزدىڭ الەۋمەتتىك-ساياسي جانە ەكونوميكالىق دامۋىنىڭ وزەكتى ماسەلەلەرى كونتەكستىندە بيىلعى باستى ساياسي قۇجاتتىڭ نەگىزگى ەرەجەلەرىنە ساراپتامالىق تالداۋ جۇرگىزۋ.
دوڭگەلەك ۇستەل وتىرىسىنا قازاقستان رەسپۋبليكاسى پارلامەنتىنىڭ دەپۋتاتتارى، قازاقستاندىق جانە شەتەلدىك ساراپشىلار، عىلىمي قوعامداستىق، دامۋ ينستيتۋتتارى مەن ازاماتتىق قوعام وكىلدەرى، ەلورداداعى جوعارى وقۋ ورىندارىنىڭ پروفەسسورلىق-وقىتۋشىلىق قۇرامى مەن ستۋدەنتتەرى قاتىستى. ءىس-شارادا 80-نەن استام قاتىسۋشى بولدى.
مەملەكەت باسشىسىنىڭ جىل سايىنعى حالىققا جولداۋى ەلىمىزدىڭ نەگىزگى زاڭىندا بەكىتىلگەن مەملەكەت باسشىسىنىڭ كونستيتۋتسيالىق مىندەتى عانا ەمەس، مەملەكەتتىك ساياساتتى قالىپتاستىرۋداعى ەڭ ماڭىزدى ينستيتۋت بولىپ تابىلادى.
پرەزيدەنتتىڭ قازاقستان حالقىنا بيىلعى جولداۋىندا ناقتى جاڭالىقتار قامتىلعان، ولاردىڭ جۇزەگە اسىرىلۋى ينستيتۋتسيونالدىق رەفورمالاردىڭ كەلەسى كەزەڭىنە نەگىز بولادى.
مەملەكەت باسشىسى ءوز جولداۋىندا ستراتەگيالىق مىندەتتەردىڭ تىزبەسىن ايقىنداپ بەردى، ولاردى شەشۋ «ادىلەتتى قازاقستان» يدەولوگيالىق تۇجىرىمداماسىن ناقتى مازمۇنمەن تولىقتىرۋدى جالعاستىرۋعا مۇمكىندىك بەرەدى. مامانداردىڭ ايتۋىنشا، جولداۋدا جۇزگە جۋىق ءتۇرلى باستامالار مەن تاپسىرمالار قامتىلعان. پرەزيدەنت ازاماتتاردىڭ ءومىر ءسۇرۋ ساپاسىن جاقسارتۋعا باعىتتالعان جۇيەلى ەكونوميكالىق رەفورمالارعا باستى نازار اۋداردى.
مەملەكەت باسشىسى قازاقستان حالقىنا جولداۋىندا ەلىمىزدىڭ ودان ءارى الەۋمەتتىك-ەكونوميكالىق دامۋىنا، اقشا-نەسيە جانە سالىق-بيۋدجەت ساياساتىنىڭ اراسىنداعى تەڭگەرىمسىزدىكتى جويۋعا، ينۆەستيتسيالىق احۋال مەن بيزنەستى جۇرگىزۋ جاعدايلارىن جاقسارتۋعا، ونەركاسىپتىك الەۋەتتى تولىق اشۋعا باعىتتالعان بىرقاتار باستامالاردى العا تارتتى. ەلدىڭ كادرلىق الەۋەتىن ارتتىرۋ، ۇلت دەنساۋلىعىن نىعايتۋ جانە ازاماتتاردى الەۋمەتتىك قولداۋ جۇيەسىن قايتا ىسكە قوسۋ بويىنشا كەشەندى شارالاردى جۇزەگە اسىرۋ، سونداي-اق قوعامدا قۇقىقتىق ءتارتىپ يدەولوگياسىن تولىققاندى نىعايتۋعا باعىتتالدى.
جولداۋدىڭ نەگىزگى يدەياسى – قۋاتتى ازاماتتىق قوعامى بار ءتيىمدى مەملەكەتتى قالىپتاستىرۋ، مەملەكەتتىڭ جاڭا ساياسي گۋمانيتارلىق ولشەمىن ارتتىرۋ.
پرەزيدەنت تۇراقتى الەۋمەتتىك-ەكونوميكالىق ىلگەرىلەۋدى قامتاماسىز ەتۋ، ازاماتتاردىڭ جاسامپازدىق الەۋەتىن جان-جاقتى اشۋ، حالىقتىڭ ءال-اۋقاتىن ناقتى ارتتىرۋ دەپ مەملەكەتتىڭ نەگىزگى مىندەتتەرىن اتادى.
شارا بارىسىندا قازاقستان رەسپۋبليكاسى پرەزيدەنتتىك ورتالىعىنىڭ ديرەكتورى باقىتجان تەمىربولاتتىڭ، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى اجار ساعاندىقوۆانىڭ، قىرعىز رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى داستان دۇيشەكەەۆتىڭ، پارلامەنتاريزم ينستيتۋتىنىڭ اتقارۋشى ديرەكتورى الماس قاناتوۆ، مەملەكەت تاريحى ينستيتۋتىنىڭ ديرەكتورى نۇربەك پۇسىرمانوۆ، ، قازاقستان رەسپۋبليكاسى پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتى ەكونوميكالىق ساياساتتى تالداۋ ءبولىمىنىڭ باس عىلىمي قىزمەتكەرى ايگۇل كوشەرباەۆا، «بىرىڭعاي «جاس ۇلان» بالالار مەن جاسوسپىرىمدەر ۇيىمى» قب ءتورايىمى دينارا سادۋاقاسوۆانىڭ باياندامالارى تىڭدالدى. سونىمەن قاتار، ەۋرازيالىق ينتەگراتسيا ينستيتۋتىنىڭ عىلىمي-تەوريالىق تالداۋ جانە ادىستەمەلىك قامتاماسىز ەتۋ ءبولىمىنىڭ مەڭگەرۋشىسى ارمان ەشمۇراتوۆ جانە قازاقستان رەسپۋبليكاسى پرەزيدەنتتىك ورتالىعىنىڭ عىلىمي قىزمەتكەرى ماريان ابىشەۆا بايانداما جاسادى.
دوڭگەلەك ۇستەلدى تالقىلاۋ ناتيجەلەرى بويىنشا ماتەريالداردىڭ ەلەكتروندىق جيناعى دايىندالادى، كەيىننەن ونى ءارى قاراي جۇمىس ىستەۋ ءۇشىن ۋاكىلەتتى مەملەكەتتىك ورگاندارعا بەرۋ جوسپارلانۋدا.
