بۇگىن تۇلكىباستىق تۇلەكتەر تاعى دا ءبىر وتباسىن قۋانىشقا بولەدى. يگى ءداستۇردى جالعاعان اباي اتىنداعى ءبىلىم وشاعى مەن ب.سادىقوۆ جانە لومونوسوۆ مەكتەبىنىڭ 20 جىل بۇرىن تۇلەپ ۇشقان تۇلەكتەرى بىرىگىپ، مۇقتاج وتباسىعا اۋدان ورتالىعىنان 5 بولمەلى قوراسى مەن سارايى قاراستىرىلعان باسپانا سىيلادى.
يگى شاراعا اۋدان اكىمىنىڭ ورىنباسارى م.جانەسەن وكرۋگ اكىمى ق.احمەتوۆ، ارداگەر ۇستازدار مەن اتالعان ءبىلىم وردالارىن بىتىرگەن تۇلەكتەر ءسوز سويلەپ، باسپانالى بولعان جاس وتباسىعا ىستىق لەبىزدەرىن ءبىلدىردى. اۋدانىمىزدىڭ باس يمامى سەرىك ماعازى دا ساۋاپتى ىسكە مۇرىندىق بولعان جاندارعا ريزاشىلىعىن ءبىلدىردى. جيىندا ومىردەن وتكەن سىنىپتاستار رۋحىنا قۇران باعىشتالدى.
ورتادان اقشا جيناپ 10 ملن تەڭگەدەن استام قاراجات جيناپ، سونىڭ 9 ملن تەڭگەسىنە ءۇي العان. سودان سوڭ تولىق جوندەۋدەن وتكىزىپ، ءىشىن قاجەتتى جيھاز-تەحنيكالارمەن جابدىقتاپ بەرىپ وتىر. ساۋاپتى ءىستى ۇران قىلعان تۇلكىباستىقتار بۇل جولى ءۇيدى سول ءۇيدىڭ اۋلاسىندا قۇدايى اس بەرىپ، ابدۋلاەۆتار وتباسىنا تابىستادى. جاس وتباسى وسى كەزگە دەيىن جالدامالى پاتەردە تۇرىپ كەلگەن.
شارا سوڭىندا «مۇقتاج جانعا كومەك بەرۋ، قايىرىمدىلىق جاساۋ – اتا-بابامىزدان بىزگە مۇرا بولىپ قالعان اسىل قاسيەت» دەپ ساناعان 2004 جىلعى مەكتەپ تۇلەكتەرى ءداستۇر بويىنشا ەستافەتانى 2005 جىلعى تۇلەكتەرگە تابىستادى.
ەسكە سالا كەتەيىك، وسىدان 7 جىل بۇرىن تۇلكىباس اۋدانىنىڭ اباي اتىنداعى مەكتەپ-ليتسەيىنىڭ مەكتەپتى بىتىرگەندەرىنە 20 جىل تولعان تۇلەكتەرى تۇرعىن ۇيگە قول جەتكىزە الماي جۇرگەن كوپبالالى وتباسىعا ءۇي سىيلاعان بولاتىن. وسىلايشا كيەلى قۇت مەكەندە كوپشىلىككە ۇلگى بولارلىقتاي يگى ىستەر ءوز جالعاسىن تابۋدا.
تۇركىستان وبلىسى اكىمىنىڭ ءباسپاسوز قىزمەتى
