Búgin túlkibastyq túlekter taǵy da bir otbasyn qýanyshqa bóledi. Igi dástúrdi jalǵaǵan Abaı atyndaǵy bilim oshaǵy men B.Sadyqov jáne Lomonosov mektebiniń 20 jyl buryn túlep ushqan túlekteri birigip, muqtaj otbasyǵa aýdan ortalyǵynan 5 bólmeli qorasy men saraıy qarastyrylǵan baspana syılady.
Igi sharaǵa aýdan ákiminiń orynbasary M.Janesen okrýg ákimi Q.Ahmetov, ardager ustazdar men atalǵan bilim ordalaryn bitirgen túlekter sóz sóılep, baspanaly bolǵan jas otbasyǵa ystyq lebizderin bildirdi. Aýdanymyzdyń bas ımamy Serik Maǵazy da saýapty iske muryndyq bolǵan jandarǵa rızashylyǵyn bildirdi. Jıynda ómirden ótken synyptastar rýhyna quran baǵyshtaldy.
Ortadan aqsha jınap 10 mln teńgeden astam qarajat jınap, sonyń 9 mln teńgesine úı alǵan. Sodan soń tolyq jóndeýden ótkizip, ishin qajetti jıhaz-tehnıkalarmen jabdyqtap berip otyr. Saýapty isti uran qylǵan túlkibastyqtar bul joly úıdi sol úıdiń aýlasynda qudaıy as berip, Abdýlaevtar otbasyna tabystady. Jas otbasy osy kezge deıin jaldamaly páterde turyp kelgen.
Shara sońynda «Muqtaj janǵa kómek berý, qaıyrymdylyq jasaý – ata-babamyzdan bizge mura bolyp qalǵan asyl qasıet» dep sanaǵan 2004 jylǵy mektep túlekteri dástúr boıynsha estafetany 2005 jylǵy túlekterge tabystady.
Eske sala keteıik, osydan 7 jyl buryn Túlkibas aýdanynyń Abaı atyndaǵy mektep-lıeıiniń mektepti bitirgenderine 20 jyl tolǵan túlekteri turǵyn úıge qol jetkize almaı júrgen kópbalaly otbasyǵa úı syılaǵan bolatyn. Osylaısha kıeli qut mekende kópshilikke úlgi bolarlyqtaı ıgi ister óz jalǵasyn tabýda.
Túrkistan oblysy ákiminiń baspasóz qyzmeti
