تۇركىستان مۋزىكالىق دراما تەاترىنىڭ «كەلىندەر كوتەرىلىسى» قويىلىمى وڭىرلىك تەاترلار اراسىندا ۇزدىكتەر قاتارىنان تابىلىپ، «جىلدىڭ ەڭ ۇزدىك ايماقتىق قويىلىمى» نوميناتسياسىنا يە بولدى. جەڭىمپازداردى سالتاناتتى ماراپاتتاۋ راسىمىندە ارنايى سىي تابىستالدى.
قازاقستاننىڭ مادەنيەت، ونەر جانە سپورت سالاسىنداعى «Kazakhstan Ticketon Awards 2024» جەتىنشى جانە ەڭ ايگىلى سىيلىعى – Ticketon Awards-قا داۋىس بەرۋ ارقىلى انىقتالىپ وتىر. جالپى داۋىس بەرۋ ءبىر ايعا جالعاسقان. وعان كەز كەلگەن قازاقستاندىق قاتىسقان. ءتۇرلى نوميناتسيا بويىنشا بارلىعى 154 620 داۋىس بەرىلگەن. ەڭ قىزىعى، سوڭعى كۇنى 5890 داۋىس بەرۋ تىركەلگەن. وسىلايشا سپورت پەن ونەر سالاسىنداعى ەڭ سۇيىكتى، تالانتتى جانە ەلەۋلى وكىلدەرىن تاڭدادى.
«كەلىندەر كوتەرىلىسى» سپەكتاكلى كورنەكتى وزبەك جازۋشى-دراماتۋرگى سايد احمادتىڭ ەڭ تانىمال جانە تابىستى شىعارمالارىنىڭ ءبىرى بولىپ سانالادى. پەسا وتىز جىل بۇرىن جازىلعانىمەن، ءالى كۇنگە دەيىن وزەكتىلىگى مەن ماعىناسىن جوعالتقان ەمەس. بىلتىر عانا تۇركىستاندا جاڭا فورماتتا تۇساۋى كەسىلگەن قويىلىمدى كورەرمەن اسىعا كۇتەدى.
ايتا كەتەيىك، اتالعان تەاتر ۇجىمى ءۇشىنشى رەت ۇزدىكتەر قاتارىندا. 2022 جىلى «بورتە» سپەكتاكلى «جىل پرەمراسى» نومينيتساسىن السا، بىلتىر «ماحاببات مۇناراسى» «جىلدىڭ ەڭ ۇزدىك ايماقتىق قويىلىمى» نوميناتسياسىن يەلەنگەن بولاتىن.
