قر ىشكى ىستەر مينيسترلىگى ۇلتتىق ۇلان باس قولباسشىسىنىڭ ورىنباسارى كونستانتين ۆورونكيننىڭ ۇستالعانىن راستادى، دەپ حابارلايدى "ادىرنا" ۇلتتىق پورتالى.
"ىشكى ىستەر مينيسترلىگى ۇلتتىق ۇلان باس قولباسشىسى ورىنباسارىنىڭ زاڭسىز ارەكەت جاسادى دەگەن كۇدىكپەن ۇستالعانىن راستايدى. قازىرگى ۋاقىتتا قۇزىرلى ورگاندار ىشكى ىستەر مينيسترلىگىمەن بىرلەسە تەرگەۋ امالدارىن جۇرگىزىپ جاتىر. مينيسترلىك ءوز قاتارىنداعى سىبايلاس جەمقورلىقتىڭ كەز كەلگەن كورىنىستەرىنە توزبەۋشىلىك تۋرالى ءوزىنىڭ ءپرينتسيپتى ۇستانىمىن بىلدىرەدى. وسىعان بايلانىستى قولدانىستاعى زاڭناما شەڭبەرىندە وبەكتيۆتى جانە جان-جاقتى تەرگەۋ جۇرگىزىلەدى", – دەلىنگەن حابارلامادا.
ۇلتتىق ۇلاننىڭ سايتىندا، كونستانتين ۆورونكيننىڭ ۇلتتىق ۇلان باس قولباسشىسىنىڭ تەحنيكا مەن قارۋ-جاراق جونىندەگى ورىنباسارى ەكەنى جازىلعان. ول بۇل قىزمەتكە 2020 جىلدىڭ 24 قاراشاسىندا تاعايىندالعان. ول شىمكەنت قالاسىندا تۋعان، 53 جاستا.
وزبەك سوتسياليستىك كەڭەستىك رەسپۋبليكاسى جوعارعى كەڭەسى اتىنداعى سامارقاند جوعارى اسكەري اۆتوكولىك كوماندالىق ۋچيليششەسىن، قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىن، رەسەي فەدەراتسياسى قارۋلى كۇشتەرى باس شتابى اكادەمياسىنىڭ جوعارى اكادەميالىق كۋرستارىن اياقتاعان.
2020 جىلدىڭ 24 قاراشاسىنان باستاپ ۇلتتىق ۇلان باس قولباسشىسىنىڭ تەحنيكا جانە قارۋ-جاراق جونىندەگى ورىنباسارى قىزمەتىن اتقارىپ كەلگەن.
ايتا كەتەيىك، بۇعان دەيىن الماتى وبلىسى ىلە اۋدانىنىڭ اكىمى باعدات قاراساەۆتىڭ ۇستالعانى حابارلانعان ەدى. الماتى وبلىستىق پروكۋراتۋرانىڭ حابارلاۋىنشا، ىلە اۋدانىنداعى قوقىس پوليگونىن تەكسەرۋ كەزىندە اكىم سىبايلاس جەمقورلىققا قاتىسى بار دەگەن كۇدىككە ىلىنگەن.
