مادەنيەت جانە اقپارات ءمينيسترى ايدا بالاەۆا Air Astana اۋەكومپانياسىنىڭ قىزمەتكەرىنىڭ ادەپسىز قىلىعىنا قاتىستى جەلىدە جازبا جاريالادى، دەپ حابارلايدى "ادىرنا" ۇلتتىق پورتالى.
ايدا عالىمقىزى اۋەكومپانيانىڭ قىزمەتكەرلەرىن مادەنيەتتىلىكتى ساقتاۋعا، جاسى ۇلكەن جولاۋشىلارعا سىپايىلىق تانىتۋعا شاقىردى:
"قۇرمەتتى دوستار! قازاقستاننىڭ جانە كسرو-نىڭ حالىق ءارتىسى، اتى اڭىزعا اينالعان ءانشى بيبىگۇل تولەگەنوۆنى Air Astana اۋە كومپانياسىنىڭ بورتىنا وتىرعىزۋ كەزىندە بولعان وتە ىڭعايسىز جاعداي مەنى دە قاتتى الاڭداتتى.
اۋە كومپانياسى بۇل ماسەلە قاتىستى تۇسىنىكتەمە بەرىپ، اۋە قاۋىپسىزدىگىنىڭ حالىقارالىق ەرەجەلەرى ەسكە سالدى. ارينە، ۇشاقتىڭ جانە جولاۋشىلاردىڭ قاۋىپسىزدىگىن قامتاماسىز ەتۋگە ارنالعان ەرەجەلەر قاتاڭ ساقتالۋعا ءتيىس. دەگەنمەن، اۋە كومپانياسىمەن پىكىر قايشىلىعىنا بارماي-اق، ورىن العان جاعدايعا بايلانىستى ءوز ويىمدى بىلدىرگىم كەلەدى. ناقتىراق ايتقاندا، اۋە كومپانياسى مەن ونىڭ قىزمەتكەرلەرى ىشكى نۇسقاۋلىقتاردان بولەك، قاراپايىم ەتيكانى، ادامي قارىم-قاتىناستى ساقتاپ، ءوز كليەنتتەرىنە قۇرمەتپەن قاراۋى كەرەك دەپ ەسەپتەيمىن. اسىرەسە، جاسى ۇلكەن جولاۋشىلارعا، وتان الدىندا ايرىقشا ەڭبەگى بار ادامدارعا ەرەكشە قۇرمەت كورسەتىلۋگە ءتيىس. ويتكەنى اعا بۋىنعا قۇرمەت – تاربيە مەن ىشكى مادەنيەت ماسەلەسى" دەپ جازدى ول.
سونداي-اق، مينيستر بيبىگۇل تولەگەنوۆانىڭ ەل ءۇشىن قۇرمەتتى ازامات ەكەنىن ەسكە سالىپ، ىزگى تىلەگىن جازدى.
"ال قازاق ونەرىنىڭ بۇلبۇلى، ونەر مايتالمانى بيبىگۇل احمەتقىزىنا زور دەنساۋلىق، ۇزاق ءومىر مەن سارقىلماس كۇش-جىگەر تىلەيمىن!" دەدى ايدا عالىمقىزى.
ەستەرىڭىزگە سالا كەتەيىك، بۇگىن Air Astana قىزمەتكەرىنىڭ قر حالىق ءارتىسى بيبىگۇل تولەگەنوۆاعا مۇگەدەكتەرگە ارنالعان اربادا وتىرعانىنا قاراماستان دورەكىلىك تانىتىپ، بورتقا كىرگىزبەي تۇرىپ العانىن جازعان ەدىك.
