24 تامىزدا رەسەيدىڭ ءىرى ەلەكتروندى ساۋدا كومپانياسى Ozon ەلدىڭ وڭتۇستىگىندەگى ءتورت لوگيستيكالىق حابىنا ۋكراينالىق دروندار شابۋىل جاساعانىن ايتتى، دەپ حابارلايدى «ادىرنا» ءتىلشىسى euronews-قا سىلتەمە جاساپ.
كومپانيانىڭ مالىمەتىنشە، داعىستان استاناسى ماحاچكالاداعى Ozon ورتالىعىندا جەرگىلىكتى ۋاقىت بويىنشا شامامەن ساعات 05:00-دە درون شابۋىلىنان كەيىن ءورت شىققان.
Ozon بىرنەشە ادامنىڭ جاراقات العانىن، الايدا ولاردىڭ ومىرىنە قاۋىپ ءتونىپ تۇرعان جوق ەكەنىن مالىمدەدى. سونداي-اق نىساننىڭ جۇمىسى ۋاقىتشا توقتاتىلعان.
كراسنودار ولكەسىندەگى ەنەم ەلدى مەكەنىندە ورنالاسقان Ozon لوگيستيكالىق ورتالىعىندا دا ءىرى ءورت بولعانى حابارلاندى. الايدا قىزمەتكەرلەر ەۆاكۋاتسيالانىپ، زارداپ شەككەندەر تۋرالى اقپارات تۇسپەگەن.
ادىگەيسك پەن نەۆيننومىسسك قالالارىنداعى قويمالار دا درون شابۋىلى قاۋپىنە بايلانىستى ەۆاكۋاتسيالانعان. بۇل نىسانداردىڭ وزدەرىنە زاقىم كەلمەگەن.
سوڭعى وقيعالاردى ەسەپكە العاندا، سەنبىدەن بەرى Ozon-نىڭ شابۋىل نىسانىنا اينالعان وبەكتىلەرىنىڭ سانى التىعا جەتكەن. بۇعان دەيىن ۋكراينا بىرنەشە اپتا بويى كومپانيانىڭ باستى باسەكەلەسى Wildberries-كە سوققى جاساعاننان كەيىن ەلدەگى كولەمى بويىنشا ەكىنشى ءىرى ونلاين-پلاتفورما Ozon-عا نازار اۋدارعانىن مالىمدەگەن.
«ۋكراينالىق بولىمشەلەر Wildberries-ءتىڭ ەڭ ءىرى 15 لوگيستيكالىق حابىنا سوققى بەرگەننەن كەيىن، كەزەك Ozon-عا جەتتى»، – دەپ مالىمدەدى ۋكراينانىڭ قورعانىس مينيسترلىگى.
كيەۆتىڭ مالىمدەۋىنشە، ريتەيلەرلەر باسقاراتىن قويمالاردا قوس ماقساتتا پايدالانىلاتىن تاۋارلار ساقتالادى جانە ولار – رەسەيدىڭ قارۋلى كۇشتەرىن قامتاماسىز ەتەتىن جەتكىزۋ تىزبەگىنىڭ ءبىر بولىگى.
دەمالىس كۇندەرى سامارا جانە ورىنبور وبلىستارىنداعى Ozon نىساندارىنا دا سوققى جاسالعان. سونىڭ سالدارىنان جۇزدەگەن قىزمەتكەر ەۆاكۋاتسيالانىپ، نىسانداردىڭ جۇمىسى بۇزىلعان.
شابۋىلدار ينۆەستورلارعا دا اسەر ەتكەن. دۇيسەنبى كۇنى ماسكەۋ بيرجاسىندا Ozon اكتسيالارىنىڭ باعاسى 12 پايىزعا تومەندەگەن.
رەسەي ۋكراينا تاراپىنان ازاماتتىق ينفراقۇرىلىم دەپ اتاعان نىساندارعا جاسالعان شابۋىلداردى ايىپتادى. كراسنوداردا تۇنگى شابۋىل كەزىندە درون سىنىقتارىنىڭ جەكەمەنشىك بالالار ورتالىعىنا قۇلاۋى سالدارىنان ەكى بالا قازا تاۋىپ، تاعى توعىز ادام، ونىڭ ىشىندە جەتى بالا جاراقات العان. بۇل تۋرالى ءوڭىر گۋبەرناتورى ۆەنيامين كوندراتەۆ مالىمدەدى.
ايتا كەتەيىك، بۇل شابۋىلدار رەسەيدىڭ ۋكراينا پرەزيدەنتى ۆلاديمير زەلەنسكيدىڭ تۋعان قالاسى كريۆوي روگقا كۇندىز جاپپاي درون شابۋىلىن جاساعانىنان ەكى كۇن وتكەن سوڭ بولدى.
