اقش-تىڭ يرانعا ەكونوميكالىق قىسىم جاساۋى اۋقىمدى اسكەري قيمىلداردىڭ قايتا باستالۋ ىقتيمالدىعىن تومەندەتەدى. بۇل تۋرالى اقش قارجى ءمينيسترى سكوتت بەسسەنت CNBC تەلەارناسىنىڭ ەفيرىندە مالىمدەدى، دەپ حابارلايدى «ادىرنا» ءتىلشىسى.
«ەگەر ءبىز يرانعا بارىنشا ەكونوميكالىق قىسىم جاساساق، بۇل اۋقىمدى اسكەري قيمىلداردىڭ قايتا باستالمايتىنىن ءبىلدىرۋى مۇمكىن»، – دەدى مينيستر.
بەسسەنت اقش-تىڭ ۋلتيماتۋمعا نەگىزدەلگەن تاسىلىنە سۇيەنەتىن يراندى ەكونوميكالىق وقشاۋلاۋ ستراتەگياسى تۋرالى ايتتى. وعان سايكەس، وداقتاستار ۆاشينگتوندى قولداۋى نەمەسە سانكتسيالارعا تاپ بولۋى ءتيىس.
ول يرانمەن جاسالاتىن كەز كەلگەن ىسكەرلىك وپەراتسيا – بانك اۋدارىمدارىنان باستاپ مۇناي ساۋداسى مەن تەڭىز تاسىمالىنا دەيىن – اقش قارجى مينيسترلىگى مەن ۇكىمەتىنىڭ قاتاڭ قىسىمىنا ۇشىرايتىنىن اتاپ ءوتتى. ايتۋىنشا، بۇل ساياساتتىڭ ماقساتى – يران ەكونوميكاسىنىڭ تولىق كۇيرەۋىنە قول جەتكىزۋ.
Financial Times باسىلىمىنىڭ حابارلاۋىنشا، اقش تاراپىنان جاعداي ودان ءارى ۋشىققان جاعدايدا يران ەۋروپاداعى امەريكالىق اسكەري نىساندارعا سوققى بەرۋ مۇمكىندىگىن قاراستىرىپ جاتىر. باسىلىم دەرەككوزدەرى ىقتيمال نىسانداردىڭ قاتارىندا بولگاريا مەن كيپردەگى اسكەري نىسانداردى اتاعان. سونىمەن بىرگە ناتو كەز كەلگەن قاۋىپكە توتەپ بەرۋگە جانە وداقتاستارىن قورعاۋعا دايىن ەكەنىن مالىمدەدى.
The Wall Street Journal باسىلىمىنىڭ مالىمەتىنشە، شيەلەنىستىڭ كۇشەيۋى اياسىندا تەگەران يسلام رەۆوليۋتسياسى ساقشىلار كورپۋسىنىڭ (يرسك) ارمياعا ىقپالىن ارتتىرىپ، زىمىراندار مەن ۇشقىشسىز ۇشۋ اپپاراتتارىنىڭ ءوندىرىسىن ۇلعايتىپ، «اۋقىمدى قارسىلاسۋعا» دايىندالىپ جاتىر.
