جامبىلدا مۇقتاج جاندارعا تۇرعىن ءۇي سەرتيفيكاتى بەرىلەدى

2018
Adyrna.kz Telegram

جامبىل وبلىسىندا تۇرعىن ءۇي سەرتيفيكاتتارى ءۇشىن 3,2 ميليارد تەڭگە قاراستىرىلماق، دەپ حابارلايدى وبلىس اكىمدىگىنىڭ ءباسپاسوز قىزمەتى. بۇل تۋرالى وبلىس اكىمى اسقار مىرزاحمەتوۆتىڭ توراعالىعىمەن وتكەن جيىندا جان-جاقتى ايتىلىپ، تالقىلاندى.
كۇن تارتىبىندەگى ماسەلە بويىنشا وبلىس اكىمدىگىنىڭ قۇرىلىس باسقارماسىنىڭ باسشىسى جايىقباي شالداروۆ بايانداما جاسادى. باسقارما باسشىسىنىڭ ايتۋىنشا، سەرتيفيكاتتار جاڭا ۇيلەر بويىنشا عانا ەمەس، سونىمەن قاتار الەۋمەتتىك كومەك رەتىندە قايتارىمسىز جانە الەۋمەتتىك قولداۋ رەتىندە ياعني قايتارىمدى بيۋدجەتتىك كرەديت رەتىندە بەرىلەتىنىن جەتكىزدى. سەرتيفيكات مولشەرى باستاپقى جارنانىڭ ءبىر بولىگى رەتىندە 1 ميلليون تەڭگەگە دەيىنگى قارجىنى قۇراماق. بۇل باعىتتا اعىمداعى جىلى 3,2 ميليارد تەڭگە قاراستىرىلماق.
كوپشىلىكتىڭ كوكەيىندە اتالعان الەۋمەتتىك كومەك پەن قولداۋعا كىمدەر يە بولماق دەگەن زاڭدى سۇراق تۋىنداۋى مۇمكىن. جايىقباي شالداروۆتىڭ ايتۋىنشا، اتالعان سەرتيفيكات «باقىتتى وتباسى» جانە «7-20-25» باعدارلامالارى ارقىلى جۇزەگە اسادى. ناقتىراق ايتساق، «باقىتتى وتباسى» باعدارلاماسى بويىنشا مۇگەدەك بالالارى بار نەمەسە ولاردى تاربيەلەۋشi, «التىن القا»، «كۇمىس القامەن» ناگرادتالعان نەمەسە بۇرىن "باتىر انا" اتاعىن العان، سونداي-اق I جانە II دارەجەلى "انا داڭقى" وردەندەرىمەن ناگرادتالعان كوپبالالى انالار، كوپبالالى جانە تولىق ەمەس وتباسىلار اتالمىش جەڭىلدىككە قول جەتكىزە الماق. ال، «7-20-25» باعدارلاماسى اياسىندا تۇرعىن ءۇي سەرتيفيكاتتارى دەنساۋلىق ساقتاۋ، ءبىلىم بەرۋ، مادەنيەت، سپورت سالالارىنداعى جانە وزگە دە باسىم سالالارداعى قاجەتتى، تاپشى ماماندارعا ۇلەستىرىلمەك. ايتا كەتەيىك، سالالارداعى قاجەتتى ماماندار قر ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن بەكىتىلگەن.
باسقارما باسشىسىنىڭ ايتۋىنشا، قازىرگى تاڭدا 262 پاتەر دايىن تۇر. ونىڭ 209-ى 15-ءشى مولتەك اۋدانىنا، قالعانى اراي-2 شاعىن اۋدانىنا تيەسىلى.  اسقار يسابەكۇلى اتالعان باعدارلاما ارقىلى ءۇي العىسى كەلەتىن ءاربىر ساناتتاعى ادامداردى انىقتاپ، جەكە-جەكە تالداۋ جۇرگىزۋ كەرەكتىگىن باسا ايتتى. سونداي-اق، ءوڭىر باسشىسى ەڭ الدىمەن حالىقتىڭ الەۋمەتتىك وسال توپتارىن، اسىرەسە، مۇگەدەك بالالارى بار وتباسىلاردى، كوپبالالى انالاردى قولداۋدىڭ ماڭىزدىلىعىن باسا ايتتى.
باسقوسۋ بارىسىندا «نۇرلى جەر» بايدارلاماسى بويىنشا وڭىردە سالىنىپ جاتقان تۇرعىن ۇيلەر، كوپبالالى جانە از قامتىلعان وتباسىلارعا ارنالعان جاتاقحانالار جايى، جەكە تۇرعىن سالۋ ءۇشىن جەر تەلىمدەرىنە بەرۋ ماسەلەلەرى قارالدى. جيىن قورىتىندىسىمەن جاۋاپتى تۇلعالارعا ناقتى تاپسىرمالار بەرىلىپ، مىندەتتەر جۇكتەلدى.

 

"ادىرنا" ۇلتتىق پورتالى

پىكىرلەر