Jambyl oblysynda turǵyn úı sertıfıkattary úshin 3,2 mılıard teńge qarastyrylmaq, dep habarlaıdy oblys ákimdiginiń baspasóz qyzmeti. Bul týraly oblys ákimi Asqar Myrzahmetovtyń tóraǵalyǵymen ótken jıynda jan-jaqty aıtylyp, talqylandy.
Kún tártibindegi másele boıynsha oblys ákimdiginiń qurylys basqarmasynyń basshysy Jaıyqbaı Shaldarov baıandama jasady. Basqarma basshysynyń aıtýynsha, sertıfıkattar jańa úıler boıynsha ǵana emes, sonymen qatar áleýmettik kómek retinde qaıtarymsyz jáne áleýmettik qoldaý retinde ıaǵnı qaıtarymdy bıýdjettik kredıt retinde beriletinin jetkizdi. Sertıfıkat mólsheri bastapqy jarnanyń bir bóligi retinde 1 mıllıon teńgege deıingi qarjyny quramaq. Bul baǵytta aǵymdaǵy jyly 3,2 mılıard teńge qarastyrylmaq.
Kópshiliktiń kókeıinde atalǵan áleýmettik kómek pen qoldaýǵa kimder ıe bolmaq degen zańdy suraq týyndaýy múmkin. Jaıyqbaı Shaldarovtyń aıtýynsha, atalǵan sertıfıkat «Baqytty otbasy» jáne «7-20-25» baǵdarlamalary arqyly júzege asady. Naqtyraq aıtsaq, «Baqytty otbasy» baǵdarlamasy boıynsha múgedek balalary bar nemese olardy tárbıeleýshi, «Altyn alqa», «Kúmis alqamen» nagradtalǵan nemese buryn "Batyr ana" ataǵyn alǵan, sondaı-aq I jáne II dárejeli "Ana dańqy" ordenderimen nagradtalǵan kópbalaly analar, kópbalaly jáne tolyq emes otbasylar atalmysh jeńildikke qol jetkize almaq. Al, «7-20-25» baǵdarlamasy aıasynda turǵyn úı sertıfıkattary densaýlyq saqtaý, bilim berý, mádenıet, sport salalaryndaǵy jáne ózge de basym salalardaǵy qajetti, tapshy mamandarǵa úlestirilmek. Aıta keteıik, salalardaǵy qajetti mamandar QR Eńbek jáne halyqty áleýmettik qorǵaý mınıstriniń buıryǵymen bekitilgen.
Basqarma basshysynyń aıtýynsha, qazirgi tańda 262 páter daıyn tur. Onyń 209-y 15-shi móltek aýdanyna, qalǵany Araı-2 shaǵyn aýdanyna tıesili. Asqar Isabekuly atalǵan baǵdarlama arqyly úı alǵysy keletin árbir sanattaǵy adamdardy anyqtap, jeke-jeke taldaý júrgizý kerektigin basa aıtty. Sondaı-aq, óńir basshysy eń aldymen halyqtyń áleýmettik osal toptaryn, ásirese, múgedek balalary bar otbasylardy, kópbalaly analardy qoldaýdyń mańyzdylyǵyn basa aıtty.
Basqosý barysynda «Nurly jer» baıdarlamasy boıynsha óńirde salynyp jatqan turǵyn úıler, kópbalaly jáne az qamtylǵan otbasylarǵa arnalǵan jataqhanalar jaıy, jeke turǵyn salý úshin jer telimderine berý máseleleri qaraldy. Jıyn qorytyndysymen jaýapty tulǵalarǵa naqty tapsyrmalar berilip, mindetter júkteldi.
"Adyrna" ulttyq portaly
