مەملەكەت باسشىسى قاسىم-جومارت توقاەۆ ۇكىمەت پەن پارلامەنتكە ءبىر اي ىشىندە اۋىل اكىمدەرىنىڭ مارتەبەسىنە قاتىستى ۇسىنىس ازىرلەۋدى تاپسىردى. بۇل تۋرالى اقوردا جازدى، دەپ حابارلايدى "ادىرنا".
ايتا كەتەيىك، بۇگىن استانادا اۋىل اكىمدەرىنىڭ ديالوگ-پلاتفورماسى ءوتىپ جاتىر.
«مەملەكەتتىك قىزمەت جۇيەسىندەگى اۋىل اكىمدەرىنىڭ مارتەبەسى تۋرالى ماسەلەنى اينالىپ وتە المايمىز. بۇل – وتە وزەكتى دۇنيە. اتالعان ۇسىنىس بۇعان دەيىن دە بىرنەشە رەت كوتەرىلگەنىن، ءتىپتى، پرەزيدەنت اكىمشىلىگىنە ءتيىستى وتىنىشتەر تۇسكەنىن جاقسى بىلەمىن. مەملەكەتتىك قىزمەتشىلەردىڭ ساناتتارىن ناقتى بەلگىلەۋ كەرەك. ۇكىمەت پارلامەنتپەن، مەملەكەتتىك قىزمەت ىستەرى اگەنتتىگىمەن وسى ماسەلەلەردى جان-جاقتى قاراستىرىپ، ءبىر اي ىشىندە وزدەرىنىڭ ۇسىنىس-پىكىرلەرىن بەرۋگە ءتيىس. سودان سوڭ شەشىم قابىلدانادى»، - دەدى پرەزيدەنت.
پرەزيدەنت اتاپ وتكەندەي. اۋىل اكىمدىكتەرىنىڭ قىزمەتكەرلەرىن قولداۋعا ەرەكشە كوڭىل بولگەن ءجون.
«اكىمدىكتەردە، اسىرەسە، اۋىل اكىمدىكتەرىندە بۇرىن جۇمىس ىستەگەن نەمەسە قازىر دە ەڭبەك ەتىپ جۇرگەن ازاماتتار مۇنى مەملەكەتتىك قىزمەتشىنىڭ ناعىز ءومىر مەكتەبى دەپ بەكەر ايتپايدى. بۇل بارشاعا تۇسىنىكتى. ويتكەنى اكىمدىك قىزمەتكەرلەرى بيلىك پەن بۇقارا اراسىندا سەنىمدى ءارى سىندارلى ديالوگ جۇرگىزۋدى مەڭگەرىپ، ناعىز باسقارۋ ماشىعىن جەتىلدىرەدى. سول سەبەپتى اۋىل اكىمدىكتەرى قىزمەتكەرلەرىنىڭ جۇمىس ىستەۋىنە، ولاردىڭ كاسىبي تۇرعىدان وسۋىنە جاعداي جاساۋ ماڭىزدى دەپ سانايمىن»، - دەدى توقاەۆ.
