Prezıdent Qasym-Jomart Toqaev elimizge tıisti deńgeıde ınvestıııa tarta almaı otyrǵan keıbir ákimder men mınıstrlerge eskertý jasady. Bul týraly ol búgin Qazaqstan halqyna Joldaýynda aıtty, dep habarlaıdy “Adyrna” ulttyq portaly.
Memleket basshysy ınvestıııalyq ahýaldy jáne bıznes júrgizýge qajetti jaǵdaıdy jaqsartý jolynda úzdiksiz jumys isteý mańyzdy degen ustanymda.
“Dúnıe júzinde ınvestıııaǵa talas órship turǵan kezde elge qarjy tartý úshin «dál osy jerde jáne dál qazir» qaǵıdasy boıynsha sheshim qabyldaý – eń qajet shara. Sondyqtan Úkimet janyndaǵy ınvestıııa shtabyna aýqymdy quzyret berildi. Bul qadam metaldy tereń óńdeý, munaı-gaz-kómir hımııasy, týrızm, energetıka jáne mashına jasaý sııaqty mańyzdy salalardaǵy jobalardy júzege asyrý qarqynyn arttyrýǵa jol ashty. Ekonomıkaǵa salynǵan tikeleı ınvestıııa kólemin azaıtyp almaý úshin osy baǵyttaǵy jumysty kúsheıtý kerek. Keıbir ákimder men mınıstrler ınvestor tartý isine jóndi atsalyspaı otyrǵanyn atap ótkim keledi. Úkimet bul sharýany retke keltirýge tıis”, - dedi Toqaev Joldaýda.
Prezıdent memlekettik-jekemenshik áriptestik arqyly iske asyrylatyn jobalardy sapaly ázirleý kerek ekenin atap ótti
“Ásirese, halyqaralyq qarjy ınstıtýttary qatysatyn jobalarǵa basa nazar aýdarý kerek. Úkimetke halyqaralyq qarjy uıymdary memlekettik-jekemenshik áriptestik tásilimen qarjylandyryp, tolyq júzege asyratyn aýqymdy jobalardyń tizimin jasaýdy tapsyramyn. Men bıyl mamyrda «Ekonomıkany yryqtandyrý sharalary týraly» Jarlyqqa qol qoıdym. Bul qujatta kórsetilgen talaptar múltiksiz oryndalýǵa tıis”, - dedi memleket basshysy.
