تۇركيادان قازاقستانعا دۇنيەجۇزىلىك كوشپەندىلەر ويىندارىنا كەلە جاتقان وتباسى اقتاۋعا جەتتى، دەپ حابارلايدى “ادىرنا” ۇلتتىق پورتالى.
انكارا قالاسىنان استاناعا ارنايى بارا جاتقان تۇرىك ساياحاتشىلارى شاعىن اۆتوبۋسپەن جولعا شىققان.
يديل مەن بۋراك ەسىمدى ەرلى-زايىپتى ەكى جاستاعى ۇلىمەن بىرگە تۇركيادان 12-تامىز كۇنى اتتانسا، بۇگىن اقتاۋدىڭ قوناقجايلىلىعى مەن تابيعاتىنا تامسانىپ، ساپاردى جالعاستىردى.
“دۇنيەجۇزىلىك كوشپەندىلەر ويىندارىنىڭ تۇراقتى جانكۇيەرىمىز. بيىلعى ويىن باۋىرلاس قازاق ەلىندە وتەتىنىن ەستىپ قۋاندىق. كەلىپ قاتىسۋعا قازاقستان تۋريزم مينيسترلىگىنەن رۇقسات الدىق. شاعىن اۆتوبۋس ساتىپ الىپ، ءىشىن الىس جولعا جايلى ەتىپ جابدىقتادىق. كولىگىمىزدىڭ اتاۋىن جاقسى ىرىمعا بالاپ «كوشپەندى» دەپ قويدىق. بۇگىن اتاجۇرتىمىزدا قوناقاسى جەگەن سوڭ، استاناعا قاراي شىعامىز. ساپارىمىزدىڭ كوڭىلدى ءارى ەستە قالارلىقتاي ءوتىپ جاتقانىنا قۋانىپ كەلەمىز”، - دەيدى ساياحاتشى بۋراك دۋران.
تۇرىك وتباسى اقتاۋعا باكۋدەن كەمەمەن جەتكەن. 31 تامىز كۇنى تۇندە اقتاۋ تەڭىز پورتىنا ءتۇستى. باۋىرلاس ۇلت وكىلدەرى قالاداعى قوناقۇيلەردىڭ بىرىندە تىنىققان.
ويىندى تاماشالاۋعا كەلگەن جيھانكەزدەر قازاق جەرىندە كورسەتىلگەن سىي-قۇرمەتكە ريزا بولعاندارىن جەتكىزدى.
ايتا كەتەيىك، تۇرىك وتباسى استاناعا دەيىن 5400 شاقىرىم جول جۇرەدى. انىعىن ايتقاندا، تۇركيادان گرۋزياعا، كەيىن رەسەيگە ءوتىپ، تاتارستان ارقىلى قازاقستانعا جەتپەك.
