ماگيستراتۋرانىڭ مۇڭى

1091

قر ءبىلىم جانە عىلىم مينيسترلىگىنە اشىق حات!

دامىعان مەملەكەتتەر ساناتىنا قوسىلىپ كەلە جاتقاندىقتان باكالاۆردىڭ ءبىلىمى قازىرگى تاڭدا جۇمىسقا تۇرۋ ءۇشىن جەتكىلىكسىز بوپ قالدى. سەبەبى كەز كەلگەن جۇمىسقا تۇيىندەمەڭدى كوتەرىپ جۇگىرىپ بارساڭ، “ماگيستراتۋرادان العان ءبىلىمىڭىز بار ما؟” دەپ بەتىڭە باجىرايا قارايدى. ال ودان كەيىن قوعامنىڭ سۇرانىسىن ورىنداۋ ماقساتىندا ماگيستراتۋراعا دايىندالا باستايسىڭ. اۋەلى 5-6 مىڭعا قۇجاتتار ازىرلەنەدى. سوسىن “حالىق بانكتىڭ” كاسساسىنا بارىپ، نە ءۇشىن تولەپ جاتقانىڭنان حابارسىز بولساڭ دا، 8 مىڭ 200 تەڭگەڭدى ۇستاتىپ كەتەسىڭ. ەندى مىنا قىزىقتى قاراڭىز، قۇجاتقا كەتكەن 15 مىڭىڭدى بۇلداپ، قالت-قۇلت ەتىپ ارەڭ كۇن كەشىپ جۇرگەندە، جانىڭداعىلاردىڭ ماگيستراتۋرانى 3-4 مىڭ دوللارعا ساتىپ العانىن ەستيسىڭ، ەستيسىڭ دە جاعاڭدى ۇستاعاننان وزگە ارەكەت جاساۋعا قاۋقارىڭ جەتپەيدى. سەبەبى اتارعا وعىڭنىڭ بولماعانى سەكىلدى، ماگيستراتۋرانى ساتىپ الۋعا قالتاڭدا باقىر تيىنىڭ بولمايدى. ء“اي، قويشى سولاردى” دەپ قولىڭدى ءبىر سىلتەيسىڭ دە، باياعىشا تەستكە دايىندالۋىندى جالعاستىرا بەرەسىڭ. اعىلشىن كۋرسىنا دا “پالەنباي مىڭىڭدى” سارقىپ بەرەسىڭ.

سودان نە كەرەك، كوزدى اشىپ جۇمعانشا تەست تاپسىرار كۇندە كەلىپ جەتەدى. تاڭىرگە تاۋەكەل ەتىپ، “بورجومي” ماركالى سۋىڭدى قۇشاقتاپ جەتىپ باراسىڭ. نەگە “بورجومي” دەيسىز بە؟ دەمەسەڭىز دە ايتايىن، سەبەبى بىلتىرعى اقشا بەرىپ، ماگيستراتۋراعا ءتۇسىپ كەتكەندەردەن “وسى سۋدى ۇستاپ باردىم، سول ءۇشىن ماعان سۇراقتاردىڭ جاۋابىن اكەلىپ بەردى” دەگەن ەرتەگىلەرىنە ابدەن قانىق بولعانسىڭ. كوڭىلدە، بالكىم ماعان دا اكەپ بەرەر دەگەن كومەسكى ءۇمىت تە جوق ەمەس. اتتەگەن-اي، سويتسەڭ ءار جىلى، تىپتەن ءار لەك سايىن سۋدىڭ ءتۇرى دە اۋىسىپ تۇرادى ەكەن. ول، ول ما؟ دايىندالعاننان مۇلدەم وزگەشە بولىپ كەلگەن سۇراقتاردى كورىپ، كوزىڭ شاراسىنان شىعا جازداپ وتىرعاندا، قولىندا “سيقىرلى” سۋى بار اۋديتوريانىڭ 70%-80%-ى تەلەفوندى ەمىن-ەركىن قولدانىپ وتىرادى. ولارعا ءاي دەيتىن اجە، قوي دەيتىن قوجا تابىلمايدى.
ءجا، بۇنى دا قويشى. بۇدان دا وزەكتى ماسەلەگە كوشەيىن. الار بالىڭدى الىپ، باسقاسىنىڭ بارىنە رەنجىسەڭ دە، شەكتىك بالعا ىشتەي كوڭىلىڭ تولىپ، تىم بولماعاندا ءبىلىم سالاسى ساپالى بولادى دەپ وتىرعاندا، ۇكىمەت تاعى تاس توبەڭنەن سۋىق سۋدى قۇيىپ كەپ جىبەرگەندەي ەتەدى.
“25-15-15-20” شەكتىك بالىن “25-7-7-7” ەتىپ ءبىر-اق تۇسىرەدى. وسىلايشا قازاقستاننىڭ ءبىلىم دەڭگەيى كوز الدىڭدا بىرنەشە ەسە قۇلدىرايدى. سايكەسىنشە ماگيستراتۋرا دەگەن اتاعى دارداي ات تا «ۇستاعاننىڭ قولىندا، تىستەگەننىڭ اۋزىندا» كەتە بەرەدى. وزگە ەلدەردەگىدەي قول جەتپەس شىڭعا باعالانبايدى.

شەكتىك بالدىڭ كۇرت تومەندەتىلۋى جونىندە ەلىمىزگە بەلگىلى ۇستاز اياتجان احمەتجانۇلى “ەشقانداي عىلىمدا شەك جوق. عىلىمنىڭ ءبارى سان-ساپالى. ساپاسىز ماماندار دايىندالعانشا گرانتتىڭ مەملەكەتكە قايتقانى دۇرىس” دەپ پىكىر بىلدىرگەن. راسىمەن بۇگىنگى تاڭدا ساپاسىز مامانداردىڭ ساپاسىز تىرلىكتەرىنە قانىق بولىپ ءجۇرمىز. وسى ورايدا مەملەكەتتىڭ قايتا-قايتا زاڭ قابىلداۋعا شاماسى جەتپەيتىن شىعار، ايتكەنمەن كەلەسى جىلدان باستاپ ماگيستراتۋرانى تەك ءبىلىمنىڭ شىرقاۋ شىڭىنا جەتكەندەر عانا وقي الاتىنداي دارەجەگە جەتكىزۋ كەرەك. بۇل بارلىق قازاق جاستارىنىڭ ءبىرىنشى ۇسىنىسى. ەكىنشىدەن، ماگيستراتۋرانىڭ ءبىلىمىن اقشاعا ساتۋدى قىسقارتۋ قاجەت. “قولدىڭ كىرىمەن” بىلعانعان دۇنيە ەشقاشان بەرەكە اكەلمەسى انىق! ۇشىنشىدەن، تەستكە كىرگىزۋ قاعازى دا (پروپۋسك), تەست ەرەجەلەرىن ايتاتىن دىبىستاۋشى دا، قايتا قاراۋ قۇجاتى دا (اپەللياتسيا) تۇگەلىمەن قازاقشالانسىن! سەبەبى ءوز ەلىمىزدە، ءوز تىلىمىزدە سىناق تاپسىرىپ تۇرىپ، كوپ دۇنيەنىڭ ورىس تىلىندە بولعانى وزەكتى ورتەپ جىبەرەدى ەكەن. سوندىقتان، جوعارىدا اتالعان ماسەلەلەردى قر ءبىلىم جانە عىلىم مينيسترلىگى نازارىنا الادى دەپ سەنەمىز.

ءيا، جاستاردىڭ وقۋى جولىنداعى تۇيتكىلدى ماسەلەلەردىڭ باسى اشىلسا، ەلىمىزدىڭ بولاشاعى جارقىن بولارى حاق. سەبەبى ەلباسىمىز ايتپاقشى “تەرەڭ ءبىلىم تاۋەلسىزدىگىمىزدىڭ تىرەگى، اقىل-وي ازاتتىعىمىزدىڭ الداسپانى”.

اقگۇل ايداربەكوۆا

"ادىرنا" ۇلتتىق پورتالى

پىكىرلەر