رەسەي شەتەلدە ءوز ازاماتتارىن قورعاۋ ءۇشىن قارۋلى كۇشتەرىن قولدانا الادى. مۇنداي زاڭدى مەملەكەتتىك دۋما ءۇشىنشى وقىلىمدا قابىلدادى، دەپ حابارلايدى «ادىرنا» ءتىلشىسى ربك-عا سىلتەمە.
زاڭنامالىق باستامانى 381 دەپۋتات (84,7%) قولدادى. قالىس قالعاندار دا، قارسى داۋىس بەرگەندەر دە بولماعان.
زاڭ جوباسىنا سايكەس، قارۋلى كۇشتەر مەملەكەت باسشىسىنىڭ شەشىمىمەن شەتەل سوتتارىنىڭ شەشىمى بويىنشا قاماۋعا الىنعان، ۇستالعان نەمەسە قىلمىستىق نە وزگە دە قۋدالاۋعا ۇشىراعان رەسەي ازاماتتارىن قورعاۋ مىندەتتەرىن ورىنداۋعا تارتىلۋى مۇمكىن. بۇل نورمالار تەك رەسەي قاتىسپايتىن جانە ولاردىڭ قۇزىرەتى رەسەيمەن جاسالعان حالىقارالىق شارتقا نەمەسە بۇۇ قاۋىپسىزدىك كەڭەسىنىڭ قارارىنا نەگىزدەلمەگەن سوتتارعا قاتىستى قولدانىلادى.
سونداي-اق پرەزيدەنت شەشىمىمەن مەملەكەتتىك ورگاندار دا ءوز وكىلەتتىگى شەگىندە ازاماتتاردى قورعاۋ ءۇشىن قاجەتتى شارالاردى قابىلدايدى.
قورعانىس كوميتەتىنىڭ توراعاسى اندرەي كارتاپولوۆ بۇل نورمالاردىڭ ەنگىزىلۋى پولشادا رەسەيلىك ارحەولوگ الەكساندر بۋتياگيننىڭ قاماۋعا الىنۋىنا ۇقساس جاعدايلاردىڭ الدىن الۋعا مۇمكىندىك بەرەتىنىن ايتقان. ول ءساۋىر ايىندا بەلارۋس شەكاراسىندا وتكەن الماسۋ اياسىندا رەسەيگە قايتارىلعان ەدى.
ايتا كەتەيىك،ەگەر زاڭعا رەسەي پرەزيدەنتى ۆلاديمير پۋتين قول قويسا، ول رەسمي جاريالانعاننان كەيىن 10 كۇن وتكەن سوڭ كۇشىنە ەنەدى.
