قازاقستاننىڭ ەڭبەك سىڭىرگەن ءارتىسى نۇرلان ونەرباەۆ تۇركىستان وبلىسىنىڭ «قۇرمەتتى ازاماتى» اتاندى، دەپ حابارلايدى «ادىرنا» ءتىلشىسى.
ماراپات كونستيتۋتسيا كۇنىنە ارنالعان «ايبارى مىقتى – اتا زاڭ» ءىس-شاراسىندا تابىستالدى.
29 تامىز كۇنى «كونگرەسس حولل» كوپسالالى كەشەنىندە وتكەن ءىس-شارادا ءوڭىر باسشىسى دارحان ساتىبالدى ارنايى قاتىسىپ، وبلىس جەتىستىكتەرى تۋرالى بايانداما جاسادى. سونىمەن قاتار تۇرعىنداردى مەرەكەمەن قۇتتىقتادى.
«مەملەكەت باسشىسى قاسىم-جومارت توقاەۆتىڭ تىكەلەي قولداۋىمەن وڭىردە اۋقىمدى جوبالار قولعا الىندى. وسى ماڭىزدى ىستەردى اتقارۋعا ۇلەس قوسىپ جۇرگەن بارشاڭىزعا العىسىمدى بىلدىرەمىن. وبلىس تۇرعىندارىنىڭ 80 پايىزى اۋىلدى ەلدى مەكەندەردە تۇرادى جانە اۋىلدى جەرلەردى قاجەتتى ينفراقۇرىلىممەن قامتۋ – باستى باعىتىمىزدىڭ ءبىرى. ەلىمىز بۇدان ءارى دامۋى ءۇشىن ءاربىر ازامات اتا زاڭىمىزدىڭ ۇستانىمىن قاتاڭ ساقتاي وتىرىپ، ەڭبەك ەتە ءبىلۋى ءتيىس. بۇل رەتتە، «ەڭبەك ادامى» بەينەسىن ناسيحاتتاۋ بولاشاق ۇرپاق ءۇشىن تاپتىرماس ۇلگى بولارى حاق. اتا زاڭدى ارداق تۇتقان ونەگەلى ەلىمىز وركەندەي بەرسىن»، – دەدى ول.
ايتا كەتەيىك، تۇركىستان وبلىسىنىڭ «قۇرمەتتى ازاماتى» اتاعىن العاندار قاتارىندا تۇركىستان وبلىسىنىڭ ەكس-اكىمى ومىرزاق شوكەەۆ، پارلامەنت ءماجىلىسىنىڭ دەپۋتاتى قازىبەك يسا، قازاقستان مۇسىلماندارىنىڭ تۇڭعىش باس ءمۇفتيى راتبەك قاجى نىسانبايۇلى بار.
