پرەزيدەنت قاسىم-جومارت توقاەۆ قازاقستاننىڭ مۇناي ونەركاسىبىنە 125 جىل تولۋىنا وراي ۇيىمداستىرىلعان سالتاناتتى ءىس-شاراعا قاتىسىپ، سالا قىزمەتكەرلەرىن قۇتتىقتادى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
«بارىڭىزگە ءمالىم، قازاق مۇنايى عاسىرلار توعىسىندا العاش رەت اتىراۋ ايماعىنان الىندى. سودان بەرى بۇل سالا ەل ەكونوميكاسىندا ايرىقشا ءرول اتقارىپ كەلەدى. حالقىمىز دا مۇنايدى «قارا التىن» دەپ اتايدى. دۇنيە ءجۇزىنىڭ وركەندەۋ جولى ەنەرگەتيكا رەسۋرستارىمەن تىعىز بايلانىستى بولدى. عىلىم مەن تەحنولوگيانىڭ دامۋىنا قۋات كوزدەرى ەرەكشە ىقپال ەتتى. وسى ۇردىسكە قازاق جەرىندەگى قارا التىن ءوندىرىسى دە مول ۇلەس قوسقانى ءسوزسىز، – دەدى مەملەكەت باسشىسى.
قاسىم-جومارت توقاەۆ قازاقستاننىڭ مۇناي ونەركاسىبى ءوز تاريحى مەن ءداستۇرى بار سالا ەكەنىنە توقتالىپ، ونىڭ قالىپتاسىپ، دامۋىنا ەلىمىزگە بەلگىلى تۇلعالار زور ەڭبەك سىڭىرگەنىن جەتكىزدى.
«گەولوگتارىمىز كوپتەگەن كەن ورنىن اشتى. سافي وتەباەۆ، جولداسقالي دوسمۇحامبەتوۆ، بولەكباي ساعىنعاليەۆ باستاعان ماماندار كەنىشتەردى ەل يگىلىگىنە جاراتتى. ولاردىڭ تاعىلىمدى ەڭبەك جولى ءاردايىم جاس ۇرپاققا ۇلگى بولارى انىق. اعا بۋىننىڭ ونەگەلى ءىسىن كەيىنگى ۇرپاق لايىقتى جالعاستىرۋدا. بۇل سالادا تۇتاس ەڭبەك ديناستيالارى بار، ياعني، قارا التىن ءوندىرىسى بۇگىندە مۇنايلى ايماقتىڭ اتا كاسىبىنە اينالدى»، – دەدى قاسىم-جومارت توقاەۆ.
مەملەكەت باسشىسى مۇناي مەن گازدى ەلىمىزدىڭ ستراتەگيالىق رەسۋرسى ءارى مەملەكەت ەكونوميكاسىنىڭ تىرەگى دەپ اتادى. بۇل رەتتە مۇنايشىلاردىڭ ەڭبەگىن جوعارى باعالادى
«قازىر وسى سالادا 250 مىڭعا جۋىق ادام جۇمىس ىستەيدى. مۇناي-گاز ونەركاسىبى زامانعا ساي دامىپ كەلەدى. وندىرىسكە يننوۆاتسيالىق تەحنولوگيالار ەنگىزىلىپ جاتىر. ەكولوگيانى ساقتاۋعا ارنالعان جاڭا ستاندارتتار قالىپتاستى. قازاقستاندا مۇناي وندىرۋمەن قاتار، ونى وڭدەۋ جۇمىسى جولعا قويىلعان. نەگىزگى جانار-جاعارماي ونىمدەرىنىڭ كوبى ءوز ەلىمىزدەن شىعادى. «قازمۇنايگاز» ۇلتتىق كومپانياسى بۇل جۇمىسقا زور ۇلەس قوسىپ كەلە جاتىر. قازاقستان الەمدىك مۇناي نارىعىندا باستى ءرول اتقاراتىن ەلدەردىڭ بىرىنە اينالدى. دۇنيە جۇزىنە بەلگىلى برەندىمىز بار. ەلىمىزدىڭ ەنەرگەتيكالىق قاۋىپسىزدىگى نىعايا ءتۇستى»، – دەدى پرەزيدەنت.
مەملەكەت باسشىسىنىڭ ايتۋىنشا، Chevron, ExxonMobil, CNPC, Eni, Shell, لۋكويل، Total جانە Sinopeس سياقتى جەتەكشى الەمدىك مۇناي-گاز كورپوراتسيالارى ەلىمىزدە اتالعان سالانى دامىتۋعا ەرەكشە ىقپال ەتىپ وتىر.
«تەڭىز، قاشاعان، قاراشىعاناق كەن ورىندارىن يگەرۋ، كاسپي قۇبىر جەلىسى كونسورتسيۋمى جوباسىن ىسكە اسىرۋ – مەملەكەت پەن ينۆەستورلار اراسىنداعى ءوزارا ءتيىمدى ىنتىماقتاستىقتىڭ جارقىن ۇلگىسى. قازاقستان بۇل سالادا اشىق جانە جان-جاقتى ويلاستىرىلعان ساياسات جۇرگىزۋ ارقىلى جاھاندىق ەكونوميكاعا دەندەپ ەنىپ، ۇلكەن كولەمدە ينۆەستيتسيا تارتىپ جاتىر»، – دەدى پرەزيدەنت.
جيىن سوڭىندا پرەزيدەنت مۇناي-گاز سالاسىندا ءونىمدى ەڭبەك ەتىپ، ەلىمىزدىڭ وركەندەۋىنە زور ۇلەس قوسقان بىرقاتار ازاماتتى مەملەكەتتىك ناگرادالارمەن ماراپاتتادى.
