پرەزيدەنت قاسىم-جومارت توقاەۆ قازاقستان مەن قىتاي اراسىنداعى ماڭگى جانە جان-جاقتى ستراتەگيالىق سەرىكتەستىك بەرىك تاريحي نەگىزگە سۇيەنەتىنىن اتاپ ءوتتى. مەملەكەت باسشىسىنىڭ ايتۋىنشا، ەكى ەل اراسىنداعى قارىم-قاتىناس ءوزارا سەنىم مەن تاتۋ كورشىلىك قاعيداتتارى نەگىزىندە جاڭا قارقىنمەن دامىپ كەلەدى. بۇل تۋرالى اقوردا جاريالادى، دەپ حابارلايدى "ادىرنا".
پرەزيدەنت قازاق-قىتاي بايلانىستارىنىڭ ساپالىق تۇرعىدان جاڭا دەڭگەيگە كوتەرىلگەنىن ايتتى. ونىڭ سوزىنشە، بۇعان قىتاي توراعاسى سي ءتسزينپيننىڭ تىكەلەي قولداۋى ماڭىزدى ىقپال ەتىپ وتىر.
ء«بىز ماڭگىلىك دوس ءارى سەنىمدى سەرىكتەس رەتىندە ىنتىماقتاستىعىمىزدىڭ جاڭا “التىن 30 جىلدىق” كەزەڭىنە قادام باسىپ جاتىرمىز»، – دەدى قاسىم-جومارت توقاەۆ.
مەملەكەت باسشىسى قىتايدىڭ قازاقستاننىڭ ەڭ ءىرى ساۋدا سەرىكتەسى ەكەنىن اتاپ ءوتتى. بىلتىر ەكى ەل اراسىنداعى تاۋار اينالىمى رەكوردتىق كورسەتكىشكە جەتىپ، 50 ميلليارد دوللارعا جۋىقتاعان. قازىر ەكى ەلدىڭ ۇكىمەتتەرى بۇل كولەمدى 100 ميلليارد دوللارعا دەيىن ارتتىرۋ باعىتىندا جۇمىس ىستەپ جاتىر.
ينۆەستيتسيالىق ىنتىماقتاستىق تا تۇراقتى تۇردە دامىپ كەلەدى. قىتايدىڭ قازاقستان ەكونوميكاسىنا سالعان ينۆەستيتسياسى 29 ميلليارد دوللاردان اسقان. وسىلايشا، قىتاي ەلىمىزدىڭ ءىرى ينۆەستورلارىنىڭ بىرىنە اينالدى. قازىرگى ۋاقىتتا قازاقستاندا قىتايدىڭ قاتىسۋىمەن 9 مىڭنان استام كاسىپورىن جۇمىس ىستەپ جاتىر.
توقاەۆتىڭ ايتۋىنشا، ەكى ەل اراسىنداعى سەرىكتەستىك ونەركاسىپ، تسيفرلاندىرۋ، «اقىلدى قالالار»، سپۋتنيكتىك تەحنولوگيالار، اۋىل شارۋاشىلىعى، دەنساۋلىق ساقتاۋ جانە ءبىلىم بەرۋ سالالارىن دا قامتيدى.
پرەزيدەنت ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىمنىڭ راتيفيكاتسيالانۋى ەكىجاقتى ەكونوميكالىق ىنتىماقتاستىقتى دامىتۋعا قاجەتتى قۇقىقتىق نەگىز قالىپتاستىرعانىن اتاپ ءوتتى.
سونىمەن قاتار مەملەكەت باسشىسى قازاقستان مەن قىتاي اراسىنداعى ۆيزاسىز رەجيمنىڭ ىسكەرلىك بايلانىستاردىڭ كەڭەيۋىنە وڭ اسەر ەتىپ وتىرعانىن ايتتى.
«قازىرگى كەزدە قازاقستاندا قوماقتى ينۆەستيتسيا تارتىپ، ءىرى جوبالاردى ىسكە اسىرۋعا بارىنشا وڭتايلى جاعداي جاسالعان دەپ سەنىممەن ايتۋعا بولادى»، – دەدى پرەزيدەنت.
ونىڭ ايتۋىنشا، بيىل 1 شىلدەدە كۇشىنە ەنگەن كونستيتۋتسيانىڭ نەگىزگى ەرەجەلەرى ەلدىڭ ينۆەستيتسيالىق الەۋەتىن نىعايتۋعا قۇقىقتىق نەگىز قالىپتاستىردى.
قاسىم-جومارت توقاەۆ بۇل پىكىرىن الماتىدا ءوتىپ جاتقان «قازاقستان – قىتاي» ينۆەستيتسيالىق فورۋمىندا ايتتى.
فورۋم باستالار الدىندا جيىنعا قاتىسۋشىلار ماڭعىستاۋ وبلىسىندا بولعان قايعىلى وقيعا سالدارىنان قازا تاپقان اسكەري قىزمەتشىلەردى ءبىر مينۋت ۇنسىزدىكپەن ەسكە الدى.
