قر كونستيتۋتسياسى كۇنى مەرەكەسىن الاكول اۋدانى، بيباقان اۋىلىنىڭ تۇرعىندارى قۋانىشتى جاڭالىقپەن قارسى الدى. كوپتەن كۇتكەن زاماناۋي سۋ قۇبىرى ىسكە قوسىلىپ، اۋىلعا تازا ءارى جاڭا اۋىز سۋ جۇيەسى پايدالانۋعا بەرىلدى.
«سۋ - تىرشىلىك كوزى، جەردىڭ ءنارى» دەگەن دانا حالقىمىز. بۇگىندە، مەملەكەت باسشىسىنىڭ 2025 جىلى قازاقستان حالقىن 100 پايىز تازا اۋىز سۋمەن قامتاماسىز ەتۋ تاپسىرماسىن ىسكە اسىرۋ ماقساتىندا اۋدان بويىنشا 56 ەلدى-مەكەننىڭ 48-ءى اۋىز سۋمەن قامتاماسىز ەتىلگەن. بيىلعى جىلى كوكتۇما، تەرەكتى، توقجايلاۋ، ەكپىندى اۋىلدارىندا اۋىز سۋ جۇيەسىنىڭ قۇرىلىس جۇمىستارى باستالدى. جىل سوڭىنا دەيىن ەلدى-مەكەندەردى اۋىز سۋمەن قامتاماسىز ەتۋ كورسەتكىشىن 90 پايىزعا دەيىن ۇلعايتۋدى كوزدەپ وتىر.
اۋىز سۋدىڭ اۋىلدا قولجەتىمدى بولىپ، اۋلاعا دەيىن كىرگەنىنە تۇرعىندار ءدان ريزا. ونى حالىقتىڭ جىلى پىكىرى مەن العىسقا تولى سوزىنەن بايقاۋعا بولادى.
«بۇرىن سوندى اۋىلىمىزدا ورتالىقتاندىرىلعان اۋىز سۋ جۇيەسى مۇلدەم بولماعان. سۋدى اۋلامىزدا تۇرعان تۇمادان الاتىنبىز. باقشا سۋارىپ، سۋدى كوپ الساق تاۋسىلىپ قالاتىن. سوسىن ازداپ، ۇنەمدەپ قولدانۋعا ءماجبۇر بولدىق. سۋ ازدىعىنان باۋ-باقشامىز دا جايقالىپ وسپەدى. بيىل مىنە اۋىلعا تازا سۋ بەرىلدى. سۋ تازا، ءارى جۇمساق. سۋدىڭ بەرىلۋ ەكپىنى دە قاتتى. جاقسى بولدى. وسىنداي تۇرمىستىق جاعدايلارىمىز تۇزەلىپ جاتسا قانداي جاقسى، - دەيدى اۋىل تۇرعىنى قاپيزا حاميتوۆا.
ءجۇز ەلۋدەن استام تۇرعىنى بار بيباقان اۋىلىنداعى اۋىز سۋ جۇيەسىنىڭ قۇرىلىسى جۇمىستارىنا رەسپۋبليكالىق جانە وبلىستىق بيۋدجەتتەن 245 ملن. تەڭگە قاراجات ءبولىنىپ، اۋداندىق تۇرعىن ءۇي كوممۋنالدىق شارۋاشىلىعى، جولاۋشىلار كولىگى، اۆتوموبيل جولدارى جانە تۇرعىن ءۇي ينسپەكتسياسى ءبولىمىنىڭ تاپسىرىسى نەگىزىندە مەردىگەر «الاكول اسىل قۇرىلىس» جشس-گى ساپالى اياقتادى. جالپى ۇزىندىعى 6 شاقىرىمدى قۇرايتىن سۋ جۇيەسىنىڭ ءبىر ەرەكشەلىگى – توتەنشە جاعدايلاردى، ءورت قاۋىپسىزدىگىن الدىن-الۋ ماقساتىندا 18 تەكشە مەتردى قۇرايتىن 6 ءورت ءسوندىرۋ رەزەرۆۋارى قاراستىرىلعان.
ساپاق اۋىلدىق وكرۋگى، بيباقان اۋىلىندا 13 ابونەنت ورتالىقتاندىرىلعان اۋىز سۋ جۇيەسىنە قوسىلدى.
