كوكپاردان ۇلتتىق قۇراما سپورتشىلارى ەلورداداعى 5-ءشى دۇنيەجۇزىلىك كوشپەندىلەر ويىندارى وتەتىن «قازانات» يپپودرومىندا كوكپار جانە كوكبورى سپورتتارى بويىنشا دايىندىققا كىرىستى.
«5-ءشى دۇنيەجۇزىلىك كوشپەندىلەر ويىندارىنا كوكپاردان ۇلتتىق قۇراما مۇشەلەرى ساقاداي ساي. ءبىز استاناعا ەرتەرەك كەلىپ، جىلقىلاردىڭ الاڭعا جىلدام بەيىمدەلۋىنە جاعداي جاساپ جاتىرمىز. بۇگىن الاڭمەن تانىستىق. ساپاسى وتە جاقسى. ارينە، ءدۇبىرلى دودا ءوز جەرىمىزدە وتەتىن بولعاندىقتان ۇلكەن جاۋاپكەرشىلىكتى سەزىنىپ جاتىرمىز. قولىمىزدان كەلگەنىن جاسايمىز. ەڭ باستىسى – كوشپەندىلەر ويىندارىندا ءساتتى ونەر كورسەتىپ، التىنعا قول جەتكىزۋ»، – دەپ اتاپ ءوتتى كوكپاردان ۇلتتىق قۇراما كاپيتانى قۇرمانبەك تۇرعانبەك.
«5-ءشى دۇنيەجۇزىلىك كوشپەندىلەر ويىندارى قارساڭىندا دايىندىعىمىزدى پىسىقتاۋ ءۇشىن استاناعا كەلدىك. ويىن الاڭى كوڭىلىمىزدەن شىقتى، جىلقىلارعا دا وتە ىڭعايلى. دايىندىق جوعارى دەڭگەيدە ءوتىپ جاتىر. ءبىز سوڭعى رەت كوكبورىنى 2016 جىلى وينادىق. وسىعان دەيىنگى تاجىريبەمىزدى ەسكەرسەك، كوكبورى سپورتىنان ءبىزدىڭ جىگىتتەر التىننان ءۇمىتتى»، – دەيدى كوكپاردان ۇلتتىق قۇراما مۇشەسى ۇلان بايتورەەۆ.
كوكپار جانە كوكبورى سپورتىنان سايىس قىركۇيەكتىڭ 9-ى مەن 12-ءسى ارالىعىندا ەلورداداعى «قازانات» يپپودرومىنىڭ اۋماعىندا وتەدى. ءار سپورت تۇرىنەن 12 قاتىسۋشى بولادى.
ەسكە سالا كەتەيىك، رەسپۋبليكالىق «كوكپار» فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە «بايگە»، «ساداق اتۋ»، «تەڭگە ءىلۋ»، «اۋدارىسپاق»، «جامبى اتۋ»، «قۇسبەگىلىك»، «اسىق اتۋ»، «JORYQ» ات سپورتى جانە ت.ب. فەدەراتسيالار بار. قر ۇلتتىق سپورت قاۋىمداستىعىن يسلامبەك سالجانوۆ باسقارادى.
ايتا كەتەرلىگى، 8-13 قىركۇيەكتە استانا قالاسىندا 5-ءشى دۇنيەجۇزىلىك كوشپەندىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانۋدا. 5-ءشى دۇنيەجۇزىلىك كوشپەندىلەر ويىندارىنىڭ باس دەمەۋشىسى - ALAGEUM ELECTRIC, ويىنداردىڭ باس سەرىكتەسى - Halyk Bank. استانادا وتەتىن دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.
قر ۇلتتىق سپورت قاۋىمداستىعىنىڭ ءباسپاسوز قىزمەتى
