Kókpardan ulttyq qurama sportshylary elordadaǵy 5-shi Dúnıejúzilik kóshpendiler oıyndary ótetin «Qazanat» ıppodromynda kókpar jáne kókbóri sporttary boıynsha daıyndyqqa kiristi.
«5-shi Dúnıejúzilik kóshpendiler oıyndaryna kókpardan ulttyq qurama músheleri saqadaı saı. Biz Astanaǵa erterek kelip, jylqylardyń alańǵa jyldam beıimdelýine jaǵdaı jasap jatyrmyz. Búgin alańmen tanystyq. Sapasy óte jaqsy. Árıne, dúbirli doda óz jerimizde ótetin bolǵandyqtan úlken jaýapkershilikti sezinip jatyrmyz. Qolymyzdan kelgenin jasaımyz. Eń bastysy – kóshpendiler oıyndarynda sátti óner kórsetip, altynǵa qol jetkizý», – dep atap ótti kókpardan ulttyq qurama kapıtany Qurmanbek Turǵanbek.
«5-shi Dúnıejúzilik kóshpendiler oıyndary qarsańynda daıyndyǵymyzdy pysyqtaý úshin Astanaǵa keldik. Oıyn alańy kóńilimizden shyqty, jylqylarǵa da óte yńǵaıly. Daıyndyq joǵary deńgeıde ótip jatyr. Biz sońǵy ret kókbórini 2016 jyly oınadyq. Osyǵan deıingi tájirıbemizdi eskersek, kókbóri sportynan bizdiń jigitter altynnan úmitti», – deıdi kókpardan ulttyq qurama múshesi Ulan Baıtóreev.
Kókpar jáne kókbóri sportynan saıys qyrkúıektiń 9-y men 12-si aralyǵynda elordadaǵy «Qazanat» ıppodromynyń aýmaǵynda ótedi. Ár sport túrinen 12 qatysýshy bolady.
Eske sala keteıik, Respýblıkalyq «Kókpar» federaııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báıge», «Sadaq atý», «Teńge ilý», «Aýdaryspaq», «Jamby atý», «Qusbegilik», «Asyq atý», «JORYQ» at sporty jáne t.b. federaııalar bar. QR Ulttyq sport qaýymdastyǵyn Islambek Saljanov basqarady.
Aıta keterligi, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi. Is-sharaǵa 89 elden 2000-nan astam sportshy qatysady dep josparlanýda. 5-shi Dúnıejúzilik kóshpendiler oıyndarynyń Bas demeýshisi - ALAGEUM ELECTRIC, Oıyndardyń Bas seriktesi - Halyk Bank. Astanada ótetin Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.
QR Ulttyq sport qaýymdastyǵynyń baspasóz qyzmeti
