ءانارۋ قالدىبەكقىزىن زورلادى دەپ ايىپتالعان بوكسشى باق وكىلدەرىن شاقىرعان كونفەرەنتسياسىنا كەلمەدى، دەپ حابارلايدى “ادىرنا” ۇلتتىق پورتالى.
بوكشسى جانقوش تۇراروۆ جەلىدەگى پاراقشاسىندا دۇيسەنبى كۇنى ءباسپاسوز كونفەرەنتسياسىن وتكىزىپ، جاعدايعا بايلانىستى مالىمدەمە جاسايتىنىن ايتقان ەدى. الايدا سپورتشى بۇگىن جۋرناليستەر جينالعان وتىرىسقا كەلمەدى.
ونىڭ ادۆوكاتى سامات مامىتوۆ كونفەرەنتسياعا قاتىسىپ، باق سۇراعىنا جاۋاپ بەردى.
ادۆوكات جانقوش پەن ءانارۋ قۇرمانالىنىڭ الەۋمەتتىك جەلى ارقىلى تانىس بولعاندارىن راستادى.
«ەكەۋى الەۋمەتتىك جەلى ارقىلى تانىس. حات جازىسىپ تۇرعان. بىراق ول حاتتا قانداي اڭگىمە ايتىلعانىن مەن بىلمەيمىن. قازىر سىزدەرگە قىلمىستىق ءىس ماتەريالدارىنان اقپارات بەرە ايتا المايمىن. سەبەبى ءبىز مالىمەتتەردى جاريالاماۋ تۋرالى قۇجاتقا قول قويدىق»، - دەدى سامات مامىتوۆ.
ودان بولەك، سپورتشىنىڭ ادۆوكاتى “زورلاندىم” دەگەنگە بويجەتكەنگە سپورتشىنىڭ اقشا ۇسىنعانى تۋرالى اقپاراتتى جوققا شىعاردى.
«قازىر ءبىز بىرنەشە نۇسقانى قاراستىرىپ جاتىرمىز: ءبىرىنشىسى – دەرت نەمەسە پسيحيكالىق سيپاتتاعى اۋىتقۋ; ەكىنشىسى – حايپ، تانىمال بولۋ نەمەسە بىرەۋدىڭ تاپسىرىسى. نە بولماسا باسقا فاكتورلار، مەن ولاردى قازىر ايتا المايمىن»-دەدى.
كونفەرەنتسيادا بوكشسى جانقوش تۇراروۆتىڭ قازىر 28 قىركۇيەكتە الماتىدا وتەتىن سايىسقا دايىندالىپ جاتقانى ايتىلدى.
ال ادۆوكات تەرگەۋ قورىتىندىسىن كۇتۋدى سۇرادى.
