باتىس قازاقستان وبلىسىندا كىسى ولتىرۋگە تاپسىرىس بەرۋ ءىسى بويىنشا سوت وتىرىسى ءوتتى، دەپ حابارلايدى “ادىرنا” پورتالى “موي گورود” باسىلىمىنا سىلتەمە جاساپ.
ايىپتالۋشى رەتىندە 40 جاستاعى ەلۆيرا ەركەباەۆا مەن 33 جاستاعى ماكسيم كۋزنەتسوۆ ەسىمدى ازاماتتار بار.
باسىلىم مالىمەتىنشە، ەركەباەۆا ءوزىنىڭ بۇرىنعى كۇيەۋىن ءولتىرۋ ءۇشىن ارنايى كيللەر جالداپتى. سوت وتىرىسىندا ادۆوكات تامارا سارسەنوۆا شاعىم ءتۇسىرىپ، ايىپتالۋشى ەلۆيرا ەركەباەۆاعا قاتىستى بۇلتارتپاس شاراسىن وزگەرتۋدى سۇرادى.
"مەنىڭ قورعالۋشىم قىلمىستىق جانە اكىمشىلىك جاۋاپقا تارتىلماعان. كامەلەتكە تولماعان ەكى بالاسى بار. جارتى جىلدان بەرۋ قاماۋدا، رەجيمدى بۇزعان جوق. تۇرعىلىقتى باسپاناسى بار. ونى ۇيقاماققا جىبەرۋدى سۇرايمىز", – دەدى سارسەنوۆا.
ەكىنشى ايىپتالۋشى ماكسيم كۋزنەتسوۆتىڭ دا قورعاۋشىسى ونىڭ قانت ديابەتى مەن كوزىندە گلاۋكوما بارىن ايتىپ، شاعىممەن كەلىسكەن.
ايىپتاۋشىنىڭ دەرەگىنە سايكەس ەلۆيرا ەركەباەۆا بۇرىنعى كۇيەۋى ەربول ەركەباەۆپەن اراداعى كەلىسپەۋشىلىكتەرگە بايلانىستى ونى ءولتىرۋ ءۇشىن كيللەر جالداعان.
"بۇعان دەيىن تانىسى كۋزنەتسوۆپەن بايلانىسىپ، تاپانشا مەن كىسى ولتىرە الاتىن ادام تاۋىپ بەرۋدى سۇراعان. سونداي-اق بۇل ءۇشىن 2 ميلليون تەڭگە تولەيتىنىن دە جەتكىزگەن. كۋزنەتسوۆ كەيىن وسىنداي ادامدى ىزدەدى", – دەدى پروكۋرور ىزتىلەۋوۆا.
2023 جىلدىڭ جەلتوقسانىندا كىسى ولتىرۋگە تاپسىرىس العان عاليەۆ ۇيىمداستىرىلعان قىلمىس جايلى پوليتسياعا حابارلاپتى.
قىلمىس وسى جىلدىڭ 20 جانە 26 اقپان ارالىعىندا بولادى دەپ جوسپارلانعان.
اقساي قالاسىنداعى "بەيبارىس" سپورت كەشەنىنىڭ اۋماعىندا كۋزنەتسوۆ عاليەۆكە 500 مىڭ تەڭگە، تەرەزە اشۋ ءۇشىن بۇراندا، قولعاپ، مەديتسينالىق ماسكا مەن كوزىلدىرىك تە بەرىلگەن.
26 اقپاندا ەركەباەۆا مەن كۋزنەتسوۆتى پوليتسيا ۇستادى. دەگەنمەن سوتتا جابىرلەنۋشىنىڭ ءوزى بولمادى. ال ونىڭ وكىلى ەرلان بەردىعاليەۆ بۇرىنعى جۇبايى ەركەباەۆاعا ەشقانداي شاعىمى جوق ەكەنىن ايتتى.
ال ايىپتالۋشىلار كىناسىز ەكەنىن دالەلدەي الاتىندارىن ايتقان.
