تۇركىستان وبلىسىندا ءبىر اۋلەتتىڭ 5 ادامى بىردەي اۋىر جازا ارقالادى. ەكى ادامدى اتىپ ءولتىردى دەگەن كۇدىككە ىلىككەندەردىڭ ەكەۋىنە 20 جىل، قالعان ۇشەۋىنە 25 جىل جازا كەسىلدى، دەپ حابارلايدى «ادىرنا» ءتىلشىسى «كتك» ارناسىنا سىلتەمە جاساپ.
قاندى قىلمىس بىلتىر تامىز ايىندا ارىس قالاسىندا بولعان. جەر ءۇيدىڭ اۋلاسىندا دەمالىپ وتىرعان جىگىتتەردى بەتىن تۇمشالاعان ەكى جەندەت قارۋمەن اتىپ كەتكەن. وقيعا ورنىندا بوكستان بۇرىنعى وبلىس چەمپيونى، «چەرنىي الماس» لاقاپ اتىمەن تانىمال الماس جولداسوۆ پەن 23 جاسار جانداۋلەت قابىلوۆ كوز جۇمدى. جاراقات العان تاعى ەكى ادام اۋرۋحاناعا جەتكىزىلگەن. جارالانعانداردىڭ ءبىرى پوليتسيا قىزمەتكەرى ەكەن.
«كوپ ۇزاماي 53 جانە 25 جاستاعى جالدامالى جەندەتتەر ۇستالدى. ولار ءتىپتى ادام ولتىرۋگە تاپسىرىستى كىم بەرگەنىن دە ايتىپ بەرگەن. «چەرنىي الماس» سوتتالۋشىلاردىڭ تۋىسىن ولتىرگەن ەكەن. كەك قايتارۋ ءۇشىن جينالعان ءبىر اۋلەتتىڭ جىگىتتەرى ەكى تۋىسىن دايىنداپ، قارۋىنا دەيىن سايلاپ بەرگەن»،–دەلىنگەن حابارلامادا
كىسى ولتىرگەن اعايىندىلاردىڭ ەكەۋى 20 جىلعا، ال 24, 26 جانە 20 جاستاعى قىلمىستى ۇيىمداستىرۋشىلار 25 جىلعا سوتتالدى.
