تۇركىستاننىڭ ەڭبەك موبيلدىلىگى ورتالىعىندا ءىس جۇزىندە جۇمىسقا تۇرماعان ادامدارعا جالاقى تولەنگەن. بۇل تۋرالى بۇگىن، 21 تامىزدا قارجىلىق مونيتورينگ اگەنتتىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ «ەڭبەك موبيلدىلىگى ورتالىعى» كمم-ءنىڭ قىزمەتكەرلەرىمەن مەملەكەتكە 130 ملن تەڭگەدەن استام زالال كەلتىرىلدى.
«جاۋاپتى تۇلعالار «2021-2025» جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوباسى» اياسىندا سۋبسيديالانعان جۇمىس ورىندارىنا قاتىسۋشى تۇلعالاردىڭ جالاقىلارىن تولەۋ بارىسىندا بىرقاتار كاسىپورىن باسشىلارىمەن ءسوز بايلاسىپ، مەكەمەلەردە ءىس جۇزىندە جۇمىس جاسامايتىن 132 ازاماتتىڭ جەكە دەرەكتەرىن «ەڭبەك نارىعى» اۆتوماتتاندىرىلعان اقپاراتتىق جۇيەسىنە ەنگىزىپ، ولارعا اۋدارىلعان ايلىق جالاقىلارىن يەمدەنىپ وتىرعان»،—دەلىنگەن حابارلامادا.
